Ўзбекистонда сўнгги кунларда коронавирус билан касалланиш ҳолатлари ортиб бораётгани инобатга олиниб, Республика махсус комиссиясининг қарори билан 2021 йилнинг 28 июнидан мамлакатдаги умумий овқатланиш объектлари — кафе, ошхона ва чойхоналарнинг ишлашига соат 08:00 дан 20:00 гача рухсат берилган эди. 20 июлдан эса уларнинг соат 08:00 дан 20:00 гача фақатгина очиқ ҳавода ишлашига рухсат берилиши белгиланди. Тадбиркор Зафар Ҳошимов ва Telegram’даги «Давлетовуз» канали коронавирусга қарши курашда кафе-ресторанларни қурбон қилмасдан, уларга қўйилган чекловларни енгиллаштиришни таклиф қилди.
Зафар Ҳошимов кафе ва ресторанлар фаолияти пандемия даврида чекланаётгани тармоқ учун оғир бўлмоқда, деб ёзмоқда. Унинг таъкидлашича, кафе ва ресторанлар тадбиркорларнинг асосий ўзаги ва форпости. Айнан шу соҳада энг ижодкор ва жасур, ҳеч қанақа рискдан тап тортмайдиган одамлар тўпланган. Бу соҳанинг яхшиси ҳам, ёмони ҳам жуда тез аён бўлади. Мазкур бизнес ҳаммага ҳам эмас. Бу бизнесда ўртамиёналик бўлмайди, ёки муваффақиятли бўлади, ёки йўқ.
«Биз, шаҳарликлар, мижозлар учун кафе-ресторанлар шунчаки ошқозон ғамини ейдиган жой эмас, балки дўстлар, яқинларимиз ва қадрли инсонларимиз билан учрашадиган, ҳаётимиздаги муҳим воқеаларни нишонлайдиган, мулоқот қиладиган, ҳаяжонли дақиқаларни кечирадиган жой ҳамдир. Кафе ва ресторанлар музокаралар учун жуда самарали жой. Чунки бир дастурхон атрофида ўтирганда ишонч ўз-ўзидан мустаҳкамланади, ўзаро келишувларга жуда тез келинади. Кафе ва ресторанлар шу маънода шаҳарнинг ижтимоий эпицентридир», — деб ёзади тадбиркор.
У кўп саёҳат қиладиган одам сифатида айнан кафе ва ресторанлар у ёки бу шаҳар ҳақидаги фикрнинг шаклланишида ҳал қилувчи аҳамият касб этишини қайд этган.
Тадбиркор айнан кафе ва ресторанлар коронавирусга қарши урушда айбдор деб топилиб, қурбонликка маҳкум этилганини тушунмаслигини ёзган. «Ишончим комилки, одамлар айнан кафе ва ресторанларда вирусни юқтириб олаётганини исботлайдиган ишончли тадқиқотлар йўқ. Гап, албатта, юзлаб одамлар билан тўй-томоша қилиш ҳақида кетмаяпти. Албатта, соат 20:00 гача ҳам кафе-ресторанларда одамлар тўпланиб қолиши мумкин, қолаверса, мавжуд талабларга бўйсунмасдан ишлаётган кафе-ресторанлар ҳам бор. Энг ёмони ҳам шу», — деб таъкидлаган Зафар Ҳошимов.
Spot’нинг ёзишича, турли ҳисоб-китобларга кўра, мамлакатда 2 миллиондан ортиқ киши кафе-ресторанлар ва у ёки бу даражада уларга алоқадор бўлган соҳаларда фаолият юритади. Рестораторлар кўплаб одамлар пулсиз қолиши ҳақида огоҳлантирган.
Зафар Ҳошимов юзага келган ушбу вазиятни зудлик билан тузатиш кераклигини айтиб, умумий овқатланиш муассасалари ўзини оқламаган вақт ва жой чекловларидан қатъи назар ҳам ишлай оладиган бир қатор чора-тадбирлар жорий қилиш мумкинлигини билдирган.
Telegram’даги «Давлетовуз» канали эса коронавирусга қарши кураш, албатта, мантиқ ва илмий хулосаларга асосланса, иқтисодиёт ҳам ютқазмаслигини, одамларда ҳам ҳақли эътирозлар туғилмаслигини таъкидлаган.
«Тошкентда яшайдиган одам борки, соат 20:00 дан кейин ишлайдиган ‘элита’ жойларни ҳам, пана-панада ишлайдиган одми жойларни ҳам билади. Кимдир танка билан, кимдир пул билан, кимдир тақдирга таваккал қилиб ишлаяпти. Қарийб 16 ойки, коронавирусга қарши яхшигина тажриба тўпладик. Лекин қадамларимизда ҳали ҳам мантиқсизлик бор. Бир марталик чоралар, мантиқсиз хатти-ҳаракатлардан тийилайлик. Миллиардлаб маблағ сарфлаб фестиваль-концерт ўтказиб, сўнг миллиардлаб солиқ ва миллион одам учун ош-нон берадиган кафе-ресторанларни ёпмайлик. Бу йўқотишни ҳеч ким қопламаяпти, афсуски. Биз Америка эмасмиз, ‘вертолёт пулларимиз’ йўқ.
Модомики шундоқ ҳам кафе-ресторанларни вирус ўчоғи деб билишар экан, балки ходимларини тўлиқ эмлаган кафе-ресторанларга тўлиқ ёки вакцинанинг камида иккита дозасини олган мижозларни QR-код орқали хизмат кўрсатиш учун қабул қилишга рухсат берилар. Ҳам рағбат, ҳам иқтисодиёт юради. Ақлли, инсофли, мантиқли бўлайлик. Тўсатдан ёпиб, тўсатдан очиб ишлаш — стресс. Мавҳумлик бизнес учун ҳам, одамлар учун ҳам оғир. Махсус комиссия фаолияти шаффофроқ, унинг ҳаракатларини, ташлайдиган қадамларини прогноз қилиш имконияти бўлса, ишонч кучаяди. Ҳеч ким ютқазмайди», — деган «Давлетовуз».
Шунингдек, кундалик касалланиш ҳолатлари ортиб бораётган шароитда Махсус комиссия маълум чекловлар ўрнатиши зарурлиги табиий эканлигини тушунган ҳолда, орттирилган тажрибадан келиб чиқиб ҳамда мамлакатда кенг кўламда вакцинация ишлари олиб борилаётганини инобатга олиб, Зафар Ҳошимов билан биргаликда умумий овқатланиш корхоналари эпидемия шароитида ишлаши борасида қуйидаги ўзгартиришлар киритиш орқали уларнинг иш вақти бўйича ўрнатилган чекловларга барҳам беришни таклиф қилмоқда:
- ходимлари тўла вакцинация қилинган бўлиши;
- кафе ва ресторанларда ижтимоий масофа сақланиши;
- бир вақтда хизмат кўрсатилиши мумкин бўлган мижозлар сони чекланишини кўзда тутиш.
Изоҳ (0)