Афғонистондан АҚШ қўшинларининг ўта кескинлик билан олиб кетилиши мамлакатда вазиятнинг ёмонлашишига олиб келди. Афғонистон президенти Ашраф Ғани вазиятнинг бундай тус олишида Американи айблади, деб ёзмоқда Reuters.
«Ҳозирги вазиятнинг сабаби шундаки, бу қарор (АҚШ қўшинларини олиб чиқиш) кутилмаганда қабул қилинди», — деди президент парламентдаги чиқишида. Ғани америкаликларни бундай қадамнинг эҳтимолий оқибатлари ҳақида огоҳлантирганини айтди.
Агентликнинг хабар беришича, айни пайтда мамлакат жанубида ҳукумат кучлари «Толибон» ҳужумини тўхтатишга ҳаракат қилмоқда.
Ашраф Ғани ўз нутқида бугун Афғонистонга ҳар қачонгидан ҳам кўпроқ бирлик зарурлигини айтиб ўтди.
Унинг сўзларига кўра, «Толибон» ҳаракати тинчликка эришиш ва музокара қилиш истагини кўрсатмаяпти, Афғонистон ҳукумати эса катта имтиёзлар бериб, бу йўналишда муҳим қадамлар қўйди.
Давлат раҳбарининг таъкидлашича, ҳукуматнинг устувор вазифаси мамлакатда тинчликни таъминлаш, аммо «Толибон» ва уларнинг иттифоқчилари айтаётган сўзлари ва қилаётган ишларида самимий эмас.
Афғонистон раҳбари бугунги кунда мамлакат мисли кўрилмаган террорчилик таҳдиди билан юзлашаётганини таъкидлади. Унинг сўзларига кўра, фақат кучли бирлик бу таҳдидларга қарши туришга ва ҳарбий вазиятни ўзгартиришга ёрдам беради.
«Ҳозир бир-биримизга лой чаплаш вақти эмас. Аксинча, бугун бизга ҳар қачонгидан ҳам кўпроқ бирлик керак », — деди у.
Ғанининг сўзларига кўра, Афғонистон ҳукумати ҳеч кимга бош эгмоқчи эмас. «‘Толибон’ ё музокара столига ўтиради, ёки биз уларни жанг майдонида тиз чўктирамиз. Биз ўз танловимизни қилдик. Энди ‘Толибон’ ўз танловини қилиши керак », — деди Ғани.
Афғонистондан НАТО қўшинларини олиб чиқиш 29 апрелда бошланган, АҚШ ва «Толибон» ўртасида тузилган келишувга биноан жараён кузда якунланиши керак. Сўнгги маълумотларга кўра, АҚШ Афғонистондаги ҳарбий контингентининг 90 фоиздан кўпроғини олиб чиқиб кетди.
АҚШ қўшинларининг катта қисми олиб кетилгач, Афғонистонда «Толибон» жангариларининг ҳужумлари бошланди. Айни пайтда «Толибон» Афғонистон чегараларининг, тахминан, 90 фоизини назорат қилмоқда ва йирик шаҳарларга ҳужум уюштирмоқда.
«Толибон» Ашраф Ғани ҳукумати истеъфога чиқсагина, ўт очишни тўхтатишга рози бўлишини маълум қилган. Афғонистон Ички ишлар вазирлиги мамлакатдаги 34 та вилоятнинг 31 тасида комендантлик соати эълон қилди.
Изоҳ (0)