Bugun,

  • USD 11095.31
  • RUB 173.84
  • EUR 10772.44

Germaniya hukumati vakillari Dohada “Tolibon” harakati a’zolari bilan maxfiy uchrashuv o‘tkazdi. Bu haqda Bild nashri hukumatdagi manbalariga tayanib xabar bermoqda.

Foto: Reuters

Foto: Reuters

Gazeta ma’lumotlariga ko‘ra, 31-iyul kuni Qatar poytaxtida bo‘lib o‘tgan muzokaralarda Germaniyaga Afg‘oniston va Pokiston bo‘yicha maxsus elchi Yasper Vik vakillik qilgan. Uning suhbatdoshi Islom amirligi (“Tolibon” o‘zini shunday deb ataydi) siyosiy boshqarmasining Yevropa bilan aloqalar bo‘limi boshlig‘i mulla Abdulhaq Vosiq bo‘lgan.

Uchrashuvda Afg‘onistonda bo‘lgan gumanitar tashkilotlarning germaniyalik xodimlari uchun xavfsizlik kafolatlari hamda Germaniyaning Afg‘onistondagi xalqaro operatsiyada ishtiroki chog‘ida Bundesverga va Germaniya federal politsiyasiga yordam bergan afg‘onistonliklarning holati yuzasidan muhokamalar o‘tkazildi. Manbalarga qaraganda, Vik o‘z suhbatdoshida nisbatan “o‘rtacha taassurot” qoldirgan.

Bild qayd etishicha, Germaniya Tashqi ishlar vazirligi keyinroq “Tolibon” bilan uchrashuv o‘tkazilganini tasdiqlagan. Vazirlikdan ma’lum qilishlaricha, uning maqsadi Afg‘onistonaro muzokaralarni qayta tiklash va Afg‘onistonda sulh tuzish masalalarida tezroq progressga erishishdan iborat bo‘lgan.

Idora xabariga ko‘ra, Vik Dohada ham radikal harakat vakillari bilan, ham Kobuldagi hukumat vakillari bilan uchrashuvlar o‘tkazgan. “Federal hukumat muzokaralarni qo‘llab-quvvatladi… Germaniya vakillari har ikkala tomon vakillari bilan muntazam muzokaralar olib boradi”, — deb yozadi gazeta.

Avvalroq Xitoyda “Tolibon” delegatsiyasi va Xitoy tashqi ishlar vaziri Van I o‘rtasida uchrashuv bo‘lib o‘tgan edi. Xitoy Afg‘onistondagi barqarorlikni tiklash jarayonida “Tolibon”ning rolini qo‘llab-quvvatlashga va’da berdi.

Shuningdek, “Tolibon” vakillari Moskvada Rossiya prezidentining Afg‘oniston bo‘yicha maxsus vakili va ushbu mamlakatdagi sobiq elchi Zamir Kabulov bilan uchrashuv o‘tkazib, Rossiya diplomatlarini Markaziy Osiyo davlatlari chegaralarini buzish niyati yo‘qligiga ishontirgan edi.

Bundan tashqari, “Tolibon” harakatining delegatsiyasi Ashxobodda bo‘lib, Turkmaniston Tashqi ishlar vazirligida muzokaralar o‘tkazgan. Turkmanistonning taklifiga binoan amalga oshirilgan tashrif to‘g‘risida Ashxobod birorta rasmiy xabar bermagan. Ammo Ashxoboddagi muzokaralar haqidagi ma’lumotni “Tolibon”ning Qatardagi vakili Muhammad Naim tasdiqlagan.

Afg‘onistondan Amerika qo‘shinlari olib chiqila boshlangandan so‘ng “Tolibon” Kobul, Qandahor, Mozori-Sharif kabi shaharlarga qator yirik hujumlar uyushtirdi, ammo ularni qo‘lga kirita olmadi. O‘tgan hafta harakat vakillari mamlakat chegaralarining 90 foizini nazorat qilayotganini ma’lum qildi. BMTning ta’kidlashicha, “Tolibon” so‘nggi 20 yil ichida eng ko‘p hududlarni o‘z nazoratiga olgan.

To‘qnashuvlar natijasida nafaqat qochqinlar, balki chekinayotgan hukumat qo‘shinlari va jangarilar ham ommaviy ravishda qo‘shni Tojikiston, O‘zbekiston, Pokiston hududlariga kirib kela boshladi. Ushbu davlatlarning rasmiylari chegaralarni mustahkamladi. Xalqaro hamjamiyat Afg‘onistondagi ziddiyatning avj olishini keskin qoraladi va tomonlarni muzokaralar o‘tkazishga chaqirdi.

Izoh
Asosiy yangiliklar
Dunyo
“Daryo” kundaligida 9-dekabrda sodir bo‘lgan eng muhim voqealar
Dunyo
Qozog‘iston Rossiyaga zirhli texnika jo‘natishi haqida xabarlar tarqaldi (video)
Madaniyat
Shahzoda Garri va Megan Markl yangi hujjatli filmda Yelizavetta II ni masxaralab, qirollik oilasi a’zolarini irqchilikda aybladi (video)