Жонс Ҳопкинс университети маълумотларига кўра, дунёда коронавирус билан касалланганлар сони 198 933 145 кишини ташкил қилмоқда, шуларнинг 4 236 469 нафари вирус оқибатида вафот этган. Касалланиш ҳолатларининг кўплиги бўйича АҚШ (35,1 миллион), Ҳиндистон (31,7 миллион), Бразилия (19,9 миллион), Россия (6,2 миллион) ва Франция (6,2 миллион) олдинда бормоқда.
Япония Соғлиқни сақлаш вазирлиги карантин қоидаларига риоя қилмаган одамларни омма олдида уялтиришни бошлади: биринчи марта чет элдан қайтиб келганидан кейин карантин режимини бузган уч фуқаронинг исм-шарифлари оммага ошкор қилинди.
Японияда амалдаги қоидаларга кўра, хориждан келгандан кейин чет элликлар ва мамлакат фуқаролари икки ҳафталик карантиндан ўтиши, бу вақт мобайнида эса уларнинг жойлашган жойини кузатиб бориш имконини берадиган дастурдан фойдаланиши керак.
Олимпия ўйинлари бўлиб ўтаётган Токиода июль ўрталаридан буён коронавирусга чалиниш ҳолатлари бўйича рекордлар қайд этилмоқда. Эпидемик вазият ёмонлашуви муносабати билан Токиода фавқулодда вазият режими 31 августгача узайтирилди.
Ёшларда ва кексаларда COVID-19 билан касаллангандан кейинги дастлабки кунларда турлича симптомлар кузатилади. Лондон Қироллик коллежи олимлари шундай хулосага келди.Мутахассислар тест мусбат натижа берганидан кейинги илк уч кун ичида касалланганларда пайдо бўладиган белгиларни кузатди. Улар ҳақидаги маълумотларни тадқиқот иштирокчилари 2020 йил апрелидан октябригача махсус мобил дастур ёрдамида қайд қилиб борган.
Маълум бўлишича, турли ёш гуруҳларида ўзига хос симптомлар кузатилади. Хусусан, 16-39 ёшдагиларда, асосан, ҳид сезмай қолиш, кўкрак ёки қорин соҳасидаги оғриқ ва нафас қисиши белгилари қайд этилган.
40-59 ёш гуруҳидаги беморлар учун доимий йўтал хос бўлган, аммо кўкрак соҳасидаги оғриқ ва ҳид билишнинг йўқолиши ҳам учраган.
60 ёшдан ва, айниқса, 80 ёшдан ошганлар учун ҳид сезмай қолиш — анча кам учрайдиган симптом. Кекса беморларни кўпроқ мушаклар ва кўкракдаги оғриқ, нафас қисиши ва диарея безовта қилган.
Шунингдек, олимлар аёллар ва эркакларда ҳам симптомлар турлича бўлишини аниқлади. Иккала жинс вакиллари ҳам ҳид билмай қолиш ва кўкрак ёки қориндаги оғриқдан шикоят қилган. Аммо эркакларда нафас қисиши, ҳолсизлик ва бадан увушиши кўпроқ учрайди.
Бирлашган Араб Амирликлари (БАА) уч ёшдан ошган болалар учун Хитойнинг Sinopharm вакцинасини қўллашга рухсат берди.Тегишли қарор Абу-Дабида 900 нафар кўнгилли иштирокида ўтказилган синовлардан кейин Соғлиқни сақлаш вазирлиги томонидан қабул қилинди.
Ҳукумат маълумотларига кўра, август бошидаги ҳолат бўйича БАА аҳолисининг 78 фоиздан зиёди — тахминан 9 миллион киши — вакцинанинг битта дозасини олган, 70 фоизи эса тўлиқ эмланган.
Мавзуга доир: Хитойда Sinopharm вакцинасини болаларда қўллашга рухсат берилди. Британия эса болаларни оммавий эмлашдан воз кечди
Тадбир мақсади мамлакатларнинг коронавирусга қарши вакциналарни ва «жамоатчилик соғлиғини сақлаш соҳасидаги ресурсларни» тарқатиш бўйича ҳаракатларини фаоллаштиришдан иборат бўлиши мумкин. Оқ уй саммит тафсилотларини ноҳукумат ташкилотлар билан муҳокама қилаётгани айтилмоқда.
Изоҳ (0)