АҚШ ҳукумати Россияга 3 сентябргача Американи тарк этиши керак бўлган 24 нафар россиялик дипломат рўйхатини топширди. Бу ҳақда Россиянинг Вашингтондаги элчиси Анатолий Антонов The National Interest нашрига берган интервьюсида маълум қилди.
Антонов буни АҚШ давлат департаменти 2020 йил декабрь ойида россиялик дипломатларнинг хизмат сафарини уч йиллик муддат билан чеклаб қўйгани билан изоҳлади. Россия элчисининг таъкидлашича, бу дипломатларнинг ўрнига бошқа дипломатларни олиб келиш мумкин эмас, чунки Америка расмийлари виза бериш тартибини кучайтирган.
Антоновнинг маълум қилишича, шунингдек, АҚШ ҳукумати «ҳеч қандай сабаб кўрсатмасдан» дипломатларнинг турмуш ўртоғи ва фарзандларининг визаларини бекор қила бошлаган.
«Муддати тугаган визаларнинг узайтирилишини кечиктириш ҳолатлари ҳам Россия дипломатик ходимларини мамлакатдан сиқиб чиқаришга қаратилган. Натижада, менинг 60 га яқин ҳамкасбим (оила аъзолари билан бирга 130 киши) ҳатто фавқулодда гуманитар вазиятларда ҳам ўз ватанига қайта олмайди», — деди элчи.
Апрель ойида Вашингтон «Россия ҳукумати ва разведка хизматларининг АҚШ суверенитети ва манфаатларига қарши» ҳаракатларига жавобан Россияга қарши янги санкциялар жорий этди. Ўшанда АҚШ ўн нафар россиялик дипломат чиқариб юборилишини эълон қилди. Америка ҳукуматининг фикрича, элчихона ходимларининг бир қисми Россия махсус хизматларида ишлаган.
Россия худди шундай жавоб берди ва АҚШни дўст бўлмаган давлатлар рўйхатига қўшди. Бундан ташқари Россия АҚШ дипломатик ваколатхоналарига Россия ва учинчи мамлакатлар фуқароларини маъмурий ва техник ишчилар сифатида ёллашни тақиқлади. Шу муносабат била давлат котиби Энтони Блинкен АҚШ Москва, Владивосток ва Екатеринбургдаги Америка консулхоналарининг 180 дан ортиқ ходимини ишдан бўшатишга мажбурлигини эълон қилди.
Изоҳ (0)