Никол Пашинян Арманистон бош вазири этиб тайинланди

2 август куни Арманистон президенти Армен Саркисян Никол Пашинянни республика бош вазири лавозимига тайинлаш ҳақидаги фармонга имзо чекди. Бу ҳақда президент матбуот хизматига таяниб, «Интерфакс» хабар берди.

«Конституция қоидаларига биноан, Никол Пашинян Арманистон Республикаси бош вазири этиб тайинлансин» — дейилади президент фармонида.

Арманистон конституциясига кўра, мамлакат президенти янги сайланган Миллий Ассамблея (парламент)нинг ваколат муддати бошланганидан сўнг, дарҳол парламентдаги кўпчилик томонидан кўрсатилган номзодни бош вазир этиб тайинлайди. Пашиняннинг номзоди 2 август куни парламентдаги ҳукмрон «Фуқаролик шартномаси» фракцияси томонидан илгари сурилган.

Конституцияга мувофиқ, бош вазир тайинланганидан кейин 15 кун ичида Арманистон ҳукумати тузилади. Шундан сўнг ҳукумат бошлиғи 20 кун ичида Миллий Ассамблеяга Вазирлар Маҳкамаси дастурини киритиши керак.

20 июнь куни Арманистонда навбатдан ташқари парламент сайловлари бўлиб ўтди, унда 21 партия ва 4 та блок иштирок этди.

27 июнь куни Марказий Сайлов комиссияси муддатидан олдин ўтказилган парламент сайловларининг якуний натижаларини эълон қилди, унга кўра, Пашинян партияси 53,91 фоиз овоз билан ғалаба қозонди. Арманистоннинг собиқ президенти Роберт Кочарян бошчилигидаги «Арманистон» блоки 21,9 фоиз овоз тўплади, Арманистоннинг яна бир собиқ президенти Серж Саркисян атрофида тузилган ва Миллий хавфсизлик хизматининг собиқ директори Артур Ванесян бошчилигида «Шон-шараф» блоки эса 5,22 фоиз овоз олди.

17 июль куни Арманистон Конституциявий суди парламент сайловлари натижаларини ҳақиқий деб топди.