Қозоғистоннинг йирик шаҳарларида карантин чоралари кучайтирилади

Қозоғистон ҳукумати коронавирус билан боғлиқ оғир вазият туфайли 2 августдан республиканинг йирик шаҳарларида, шу жумладан, пойтахтда чеклов чораларини кучайтирмоқда. Инфекцияни назорат қилиш бўйича идоралараро комиссия маълумотларига кўра, мамлакатдаги кунлик касалланишнинг 65 фоизи ва кунлик ўлимнинг 55 фоизи айнан ушбу шаҳарларга тўғри келмоқда.

27 июль куни комиссия Нур-Султон, Олмаота, Чимкент, Атирау ва Қарағандада карантин чораларини кучайтиришга қарор қилди. Хусусан, Ashyq лойиҳасида қатнашмайдиган барча корхона ва ташкилотлар фаолияти тўхтатилади. Марказий давлат идоралари, маъмуриятлар, ҳуқуқ-тартибот органлари, соғлиқни сақлаш муассасалари, оммавий ахборот воситалари, озиқ-овқат дўконлари, дорихоналар ва ҳаётни таъминлайдиган ташкилотлар бундан мустасно.

Бундан ташқари, кўнгилочар, спорт, оилавий, хотира ва бошқа оммавий тадбирларни ўтказишга тақиқ жорий этилади. Шу билан бирга, давлат идоралари, идоралар, миллий компаниялар ва бошқа ташкилотлар ходимларининг 80 фоизи масофадан ишлашга ўтказилиши лозим. Охирги уч ой ичида коронавирусга қарши эмланган ва касалликдан тузалган ходимлар бундан мустасно.

Инфекцияни назорат қилиш бўйича идоралараро комиссия, шунингдек, Оқмола, Олмаота ва Қарағанда вилоятлари маъмуриятига Нур-Султон, Олмаота, Чимкент ва Қарағандага туташ ҳудудларда чекловларни кучайтириш чораларини кўришни тавсия қилди.

Комиссия раҳбари ҳамда бош вазир ўринбосари Эрали Тугжонов республиканинг айрим ҳудудларида эмлаш даражаси пастлигини қайд этди. Расмийнинг маълум қилишича, Манғистов вилоятида аҳолининг атиги 25,6 фоизи вакцинанинг биринчи компоненти билан эмланган, бу республикадаги ўртача кўрсаткич (55,4 фоиз)дан икки баравар паст. Яна олтита вилоят — Ғарбий Қозоғистон, Ақтўбе, Костанай, Қарағанда, Жамбил ва Павлодар вилоятларининг кўрсаткичлари ҳам ўртача кўрсаткичдан анча орқада.

Ҳаммаси бўлиб, 18,9 миллионга яқин аҳолига эга Қозоғистонда пандемия бошидан буён 580 379 кишида коронавирус аниқланган, 478 277 бемор касалликдан тузалган, 5957 киши вафот этган.

Мамлакатда 5 408 959 киши коронавирусга қарши вакцинанинг биринчи дозасини олган, уларнинг 3 799 879 нафари тўлиқ эмланган.

30 июль куни Қозоғистонда ўтган сутка давомида 7778 кишида коронавирус аниқланганди. Бу пандемия бошидан буён энг юқори кўрсаткич.

Ундан аввал ҳам Қозоғистонда коронавирусга чалинганлар сони бўйича кунлик рекорд янгилангани, Нур-Султонда карантин чекловлари яна кучайтирилгани, пойтахтда коронавируснинг «ҳиндча» штамми қайд этилгани ҳақида хабарлар берилганди.