Тошкентда Cobalt ҳайдовчиси йўлдан ўтаётган пиёдани уриб юбориб, унинг ўлимига сабабчи бўлди

Тошкентнинг Юнусобод туманида йўлдан ўтаётган пиёда Cobalt уриб юбориши оқибатида вафот этди. Бу ҳақда «Тошкент» телеканалида маълум қилинди.

Қайд этилишича, тахминан соат 22:00 ларда Юнусобод тумани Уч қаҳрамон томондан ҳаракатланиб келаётган Cobalt ҳайдовчиси йўлни белгиланмаган жойдан кесиб ўтаётган пиёдани уриб юборган.

Оқибатда пиёда шифохонага олиб кетилаётганида вафот этган.

Ҳолат юзасидан Тошкент шаҳар ИИБ Тергов бошқармаси томонидан Жиноят кодексининг 266-моддаси 2-қисми (транспорт воситалари ҳаракати ёки улардан фойдаланиш хавфсизлиги қоидаларини бузиш одам ўлимига сабаб бўлиши) билан жиноят иши қўзғатилган.

Бундан аввал Тошкентнинг Юнусобод туманида йўлни белгиланмаган жойдан кесиб ўтаётган 17 ёшли йигит Nexia-2 уриб юбориши оқибатида, Яккасарой туманида эса 61 ёшли киши юк машинаси уриб юбориши оқибатида воқеа жойида ҳалок бўлганди.

Шунингдек, Тошкентнинг Яшнобод туманида Matiz уриб юбориши оқибатида 65 ёшли фуқаро, Миробод туманида 20 ёшли аёл бошқарувидаги Tracker уриб кетиши оқибатида 56 ёшли пиёда воқеа жойида вафот этгани ҳақида маълум қилинганди.