Toshkentda Cobalt haydovchisi yo‘ldan o‘tayotgan piyodani urib yuborib, uning o‘limiga sababchi bo‘ldi

Toshkentning Yunusobod tumanida yo‘ldan o‘tayotgan piyoda Cobalt urib yuborishi oqibatida vafot etdi. Bu haqda “Toshkent” telekanalida ma’lum qilindi.

Qayd etilishicha, taxminan soat 22:00 larda Yunusobod tumani Uch qahramon tomondan harakatlanib kelayotgan Cobalt haydovchisi yo‘lni belgilanmagan joydan kesib o‘tayotgan piyodani urib yuborgan.

Oqibatda piyoda shifoxonaga olib ketilayotganida vafot etgan.

Holat yuzasidan Toshkent shahar IIB Tergov boshqarmasi tomonidan Jinoyat kodeksining 266-moddasi 2-qismi (transport vositalari harakati yoki ulardan foydalanish xavfsizligi qoidalarini buzish odam o‘limiga sabab bo‘lishi) bilan jinoyat ishi qo‘zg‘atilgan.

Bundan avval Toshkentning Yunusobod tumanida yo‘lni belgilanmagan joydan kesib o‘tayotgan 17 yoshli yigit Nexia-2 urib yuborishi oqibatida, Yakkasaroy tumanida esa 61 yoshli kishi yuk mashinasi urib yuborishi oqibatida voqea joyida halok bo‘lgandi.

Shuningdek, Toshkentning Yashnobod tumanida Matiz urib yuborishi oqibatida 65 yoshli fuqaro, Mirobod tumanida 20 yoshli ayol boshqaruvidagi Tracker urib ketishi oqibatida 56 yoshli piyoda voqea joyida vafot etgani haqida ma’lum qilingandi.