Жонс Ҳопкинс университети маълумотларига кўра, дунёда коронавирусга чалинганлар сони 195 392 725 кишига етди, шуларнинг 4 178 439 нафари вафот этди. Касалланиш ҳолатларининг кўплиги бўйича АҚШ (34,6 миллион), Ҳиндистон (31,4 миллион), Бразилия (19,7 миллион), Россия (6,1 миллион) ва Франция (6 миллион) етакчилик қилмоқда.
Грузияда пандемия бошидан буён энг оғир вазият кузатилмоқда
Грузия Меҳнат, соғлиқни сақлаш ва аҳолини ижтимоий муҳофаза қилиш вазирлигининг маълумотларига кўра, 26—27 июль кунлари мамлакатда SARS CoV-2 вирусини юқтириш бўйича 3666 та ҳолат қайд этилди. Бу бутун эпидемия давридаги рекорд кўрсаткич.
Сўнгги икки-уч ҳафтада, кунлик касалланишлар сони 2000 кишидан пасаймаган. Натижада расмийлар эпидемиянинг «тўртинчи тўлқини» юз бериши мумкинлиги ҳақида гапирган. Эпидемия билан боғлиқ вазиятнинг асосий кўрсаткичи ҳисобланувчи COVID-тестидаги ижобий натижалар даражаси — 8,68 фоизгача етди. Бу дунёдаги энг ёмон кўрсаткичлардан биридир. Айнан шу асосий кўрсаткичга мувофиқ, Исроил, шунингдек, бир қатор Европа давлатлари Грузияни «қизил ҳудуд»га киритиб, ушбу мамлакат билан ҳар иккала йўналишдаги ташрифларни тақиқлади.
Коронавируснинг тез тарқалиши етакчи эпидемиологларни фавқулодда ҳолатлар тўғрисида баёнот беришга ундади. Касалликларни назорат қилиш миллий маркази директори, профессор Амиран Гамкрелидзе махсус брифингда барча касалхоналар ва бошқа тиббиёт муассасалари фавқулодда режимга ўтаётганини маълум қилди. Хусусан, улар режалаштирилган операциялар ва бошқа тиббий хизмат турларига бемор қабул қилишни тўхтатади. Гамкрелидзенинг сўзларига кўра, янги юқтириш ҳолатларининг қарийб ярми «британча» ва «ҳиндча» штаммларга тўғри келмоқда.
Грузиянинг бош эпидемиологи Паата Имнадзе бундай ўсишнинг сабаби сифатида грузияликларнинг ниқоб тақиш, оммавий зиёфатлардан воз кечиш каби бошланғич меъёрларга риоя қилмаётганини кўрсатди.
Бундан ташқари, Имнадзе Pfizer ва AstraZeneca сингари ғарб вакциналарини кутиб, мамлакатда мавжуд Хитойнинг Sinopharm ва Sinovac вакциналари билан эмланишни истамаётган кишиларни танқид қилди. «Бир нечта яхши вакциналар орасидан бирини танлашга уринаётганлар вакцинага қарши кишилардан ҳам ёмонроқдир», — деди Имнадзе.
Иккала эпидемиологнинг ҳам бир овоздан огоҳлантиришича, агар тестларнинг ижобий натижалари сони кунига 3-4 минг бўлиб қолаверса, «чекловларни тиклаш муқаррар бўлади». Бироқ, яқинда Бош вазир Ираклий Гарибашвили эпидемия билан боғлиқ оғир вазият ҳақида гапирганда, янги локдаунга мамлакат дош беролмаслигини тан олганди.
Мавзуга доир: Коронавируснинг «британча» штамми Грузияда ҳам аниқланди
Исроил Соғлиқни сақлаш вазирлиги тиббиёт муассасаларига беш ёшдан 11 ёшгача бўлган болаларни коронавирусга қарши эмлаш учун рухсат берди. Аммо уларни фақат COVID-19’нинг оғир шакли билан касалланиш ёки вирус туфайли ўлим хавфи мавжуд бўлган тақдирдагина эмлаш мумкин.
«Вакцинацияни алоҳида-алоҳида кўриб чиқадиган муайян ҳолатлар мавжуд», — дейилади Соғлиқни сақлаш вазирлигида.
Вазирликдагиларнинг таъкидлашича, улар фақат шифокорларга тавсиялар берган, аммо маҳаллий шифокорлар ҳар бир алоҳида ҳолатда болани эмлаш масаласини мустақил ҳал қилиши лозим.
Исроилда оммавий вакцинация 2020 йилнинг 20 декабрида бошланган. Мамлакат Соғлиқни сақлаш вазирлигининг маълумотларига кўра, бугунги кунга келиб 5,767 миллион киши (аҳолининг 60 фоиздан кўпроғи) коронавирусга қарши вакцинанинг биринчи дозасини, 5,32 миллион киши (56 фоиз) ҳар иккала дозасини олган. Исроилда июнь ойида 12-15 ёшдаги ўсмирларни эмлаш бошланганди.
Мавзуга доир: Исроилда коронавирус янгидан авж олаётгани маълум қилинди. Мамлакатда барча чекловлар бекор қилинганди
27 июлдан мамлакатда 16-17 ёшли ўсмирларга вакцинация учун рўйхатдан ўтишга рухсат берилганди. 12—15 ёш тоифасидагиларни эмлашни бошлаш санаси кейинроқ эълон қилинади.
Ирландия Соғлиқни сақлаш вазирлиги раҳбарининг таъкидлашича, болаларнинг ота-оналари вакцинация ва ундан сўнг юзага келиши мумкин бўлган ножўя таъсирлар тўғрисида тўлиқ маълумот олади, шунингдек, улар эмлашдан олдин «мақбул қарор қабул қилиш учун» шифокор маслаҳатини олиши мумкин бўлади.
Ирландияда ўсмирлар Американинг Pfizer ва Moderna вакциналари билан эмланади. Ушбу препаратлар Европа Дори-дармон Агентлиги (ЭМА) томонидан 18 ёшгача бўлганларни эмлашда фойдаланиш учун тасдиқланган ягона вакциналардир. Вакцинация болаларнинг ота-оналари ёки уларнинг васийлари ҳузурида амалга оширилади. Мамлакат расмийлари ўқув йилининг бошига қадар 250 мингдан ортиқ мактаб ўқувчисини эмлашни режалаштирмоқда.
Шунингдек:- Швециялик экология фаоли Грета Тунберг COVID-19’га қарши эмланди. Бу ҳақда фаолнинг ўзи Twitter’да маълум қилган. У препаратнинг биринчи компонентини олган, аммо қайси препарат билан эмланганини айтмаган. Таъкидлаш жоизки, Швецияда коронавирусга қарши қуйидаги вакциналар тасдиқланган: Moderna, AstraZeneca, Pfizer / BioNTech. Грета дунёнинг вакцина олиш имкониятига эга қисмида яшаётганидан миннатдор эканини билдириб, дунё бўйлаб вакциналарнинг тарқалиши жуда нотекис эканини қўшимча қилган. The New York Times газетасининг статистик маълумотларига кўра, дунёдаги коронавирусга қарши вакциналарнинг 84 фоизи юқори ва ўрта юқори даромадли мамлакатларда ишлатилган.
- Кувайт ҳукумати 1 августдан фақат COVID-19’га қарши эмланган фуқароларга мамлакат ташқарисига чиқишга рухсат берилишини эълон қилди. Шунингдек, фуқаролар Кувайтда тасдиқланган вакциналардан бири билан эмланган бўлиши лозим. Ушбу талаблар 16 ёшгача бўлган болаларга, Соғлиқни сақлаш вазирлигининг эмлаш мумкин эмаслиги тўғрисидаги гувоҳномасига эга бўлган шахсларга, шунингдек ҳомиладор аёлларга тааллуқли эмас. Бундан ташқари, Кувайтга келувчиларнинг барчаси рейсга чиқишдан олдин COVID-19 тестидан ўтиши ва ўзида ҳеч қандай симптомлар йўқлигига ишонч ҳосил қилиши тавсия этилди. COVID-тест натижаси салбий чиқмаган кишилар етти кунлик карантиндан ўтиши керак бўлади.
Изоҳ (0)