АҚШ президенти Жо Байден Оқ уйда Беларусь мухолифати етакчиси Светлана Тихановская билан учрашди. Бу ҳақда Жо Байденнинг ўзи Twitter’даги саҳифасида маълум қилган.
Байден Twitter’да Тихановская билан учрашиш ўзи учун катта шараф эканини қайд этган ва АҚШнинг Беларусь халқининг демократия ҳамда инсон ҳуқуқлари ҳимоясини таъминлаш масалаларида қўллаб-қувватлашини баён қилган.
Ўз навбатида Светлана Тихановская Байдендан Беларуснинг зўравонликсиз демократияга эришишида ёрдам беришини сўраган. Сиёсатчи мамлакатда рўй бераётган ҳодисалар геосиёсатга алоқадор эмаслигини таъкидлаган ва беларусларни қўллаб-қувватлаш АҚШнинг асосий бурчи деб ҳисоблашини билдирди.
Тихановская АҚШга Давлат департаментининг таклифига кўра ташриф буюрган. У океан ортида АҚШ давлат котиби Энтони Блинкен, котиб ўринбосари Виктория Нуланд, АҚШ президентининг миллий хавфсизлик масалалари бўйича маслаҳатчиси Жейк Салливан ҳамда мамлакатда истиқомат қилаётган беларуслик ватандошлари билан учрашган.
Аввал июнь ойида Тихановская Чехияда Беларусь президенти сифатида қабул қилинган, Жо Байден эса Беларусга қарши санкциялар муддатини бир йилга узайтирганди.
Изоҳ (0)