Чеченистон ҳукумати коронавирусга қарши эмланмаган одамларнинг масжид ва дўконларга боришни, шунингдек, жамоат транспортидан фойдаланишни тақиқлади. Бу ҳақда бош вазир ўринбосари Ваҳит Усмаев репсублика ҳукумати ва ҳудудлар раҳбарлари иштирокида ўтган кенгайтирилган йиғилишда маълум қилган.
«Масжидларга борганда коронавирусга қарши эмланганлик ҳақида маълумотнома ва сертификатларни кўрсатиш мажбурий этиб белгиланди. Чакана савдонинг барча нуқталарида ҳам маълумотнома ва сертификатлар борлиги текширилади. Шунингдек, жамоат транспортида ҳам йўловчиларнинг тиббий ниқобда эканлиги, маълумотнома ва сертфикатга эга бўлишига эътибор қаратилади», — деган Усмаев.
Чеченистон ҳукумати раҳбарининг ўринбосари маълумотнома деганда аввал COVID-19 билан касаллангани ҳақидаги ҳужжатлар, ПЦР-тестининг манфий натижаси ҳақидаги маълумотнома ёки эмланишни кечиктириш ҳақидаги тиббий хулосани назарда тутгани борасида аниқ маълумот мавжуд эмас.
27 июлда «Роспотребнадзор»нинг Чеченистон бўйича бошқармаси республикадаги турли соҳа ходимларини, хусусан, соғлиқни сақлаш, умумий овқатланиш, маиший хизматлар ва гўзаллик салонлари ходимларини эмлашнинг мажбурий тартибда амалга оширилишини эълон қилган.
Чеченистон раҳбари Рамзан Қодиров республиканинг 17 та ҳудудидан 11 тасида катта ёшли аҳолининг 60 фоизи коронавирусга қарши эмланганини хабар қилди.
«Биз 60 фоизлик кўрсаткичда тўхтаб қолмаслигимиз ва барча аҳолини коронавирусга қарши эмлашимиз зарур», — дея ёзган Қодиров.
Шу тариқа Чеченистон Россия федерал ҳудудлари орасида биринчи бўлиб аҳолининг 60 фоиз қисмини COVID-19’га қарши эмлаган республикага айланди. Бу ҳақда Чеченистон соғлиқни сақлаш вазири Элхан Сулейманов маълум қилган. Вазирнинг сўзларига кўра, республикада 909 минг катта ёшли аҳолининг 568 минг нафари коронавирусга қарши эмланган.
Изоҳ (0)