Яқин ўн йилликлар ичида дунёда иссиқ ҳаво бўйича янги рекордлар ўрнатилади

Дунё янада юқори аномал ҳаво ҳароратига ва тез-тез янгиланадиган рекордларга тайёр туриши керак. Бу ҳақда Швейцариянинг Цюрих Олий техника мактаби қошидаги Атмосфера ва иқлим институти ходимларининг тадқиқотига асосланиб, Axios хабар берди.

Олимлар иқлим ўзгаришининг аномал юқори ҳарорат ўрнатилишига таъсири етарлича баҳоланмаганини аниқлади. Уларнинг фикрига кўра, глобал исишнинг тезлашиши бутун дунёда янада тез содир бўладиган кучли иссиқлик тўлқинларини келтириб чиқариши мумкин.

Тадқиқот шуни кўрсатдики, агар карбонат ангидрид катта миқдорда ажралиб чиқишда давом этса, рекорд даражадаги юқори ҳарорат 2021—2050 йилларда икки баравардан етти бараваргача, 2050—2080 йилларда 3 баравардан 21 бараваргача кўпроқ кузатилиши мумкин.

Axios маълумотларига кўра, АҚШнинг Тинч океани соҳилида сўнгги марта ҳарорат кўтарилган пайтда Сиэтл шаҳридаги ҳарорат Цельсий бўйича 42,2 даражага етган (Фаренгейт бўйича 108), олдинги рекорд 39,4 даража эди (103). Портлендда ҳаво ҳарорати 46,6 (Фаренгейт бўйича 116) даражагача кўтарилган, олдинги кўрсаткич эса 41,6 (Фаренгейт бўйича 107) даража эди.

Олимларнинг таъкидлашича, одатда аввалги рекордларнинг янгиланиши бир даражанинг улушлари ҳисобига бўлади.

Тадқиқот натижалари иссиқхона зарарли газларини имкон қадар тезроқ камайтириш зарурлигига ишора қилмоқда.

Axios, ўз навбатида, тадқиқотда қуйидаги хулосалар келтирилганини қайд этди: Иссиқхона газларининг Ер иқлимини қанчалик тез ўзгартириши фонида инфратузилма яратишда аввалги ҳарорат кўрсаткичларини ҳисобга олиб, қабул қилинган қарорлар самарасиз бўлиб чиқиши мумкин.