Леверкузендаги кимё заводида содир бўлган кучли портлаш оқибатида бир неча киши турли даражадаги жароҳатлар олган. Бу ҳақда Билд хабар берган.
Ҳодиса Chempark саноат зонасидаги Currenta корхонасида юз берган, бу ерда ахлат ва заҳарли чиқиндилар қайта ишланарди. Аввалига портлашнинг Байер кимё-фармацевтика компанияси заводларининг бирида кузатилгани хабар қилинганди, бироқ кейинчалик ушбу ахборот инкор этилди.
Currenta маълумотига кўра, корхонанинг камида икки нафар ходими оғир жароҳат олган, яна бир нечта кишида енгил жароҳатлар кузатилган. Беш нафар ходим ҳодисадан кейин йўқолиб қолган.
Кейинчалик FR нашри портлаш оқибатида камида 16 нафар одамнинг жароҳат олганини хабар қилди. Тўрт нафар киши оғир аҳволда эканлиги ҳақида ҳам маълумот берилди.
Айни вақтда заводдаги асосий ёнғин бартараф қилинган, бироқ ўт ўчирувчилар қўшимча олов ўчоқларини ўчириш ишларини амалга оширмоқда.
Портлашга нима сабаб бўлгани ҳали аниқланмаган, лекин бу борада ҳам суриштирув ишлари олиб борилмоқда.
Аввал июль бошида Россияда меҳмонхона портлаб кетгани ва 2 киши ҳалок бўлгани, шунингдек, Эрон пойтахти Теҳрон ғарбида кучли портлаш юз бергани ҳақида хабарлар берилганди.
Изоҳ (0)