Япониянинг Токио шаҳри мезбонлик қилаётган Олимпия ўйинларида ўзбекистонлик спортчилар 27 июль кунги чиқишларини якунлади.
Дзюдо
-63 кг вазн тоифасида ҳаракат қилаётган Фарангиз Ҳожиева дастлабки босқичда Кабо-Верде вакили Сандрин Биллетга қарши баҳс олиб борди. Беллашувда Фарангиз оғритиш усулига тушиб қолди ва Олимпиададаги иштирокини якунлади.
-81 кг вазн тоифасида иштирок этган Шарофиддин Болтабоев 1/16 финалда вануатулик Уго Кумбога имкон қолдирмади. Кейинги босқичда болгариялик Ивайло Ивановни қўшимча вақтда мағлуб этди. Чорак финалда Болтабоев австриялик Шамил Борчашвилига ютқазиб қўйди. Бронза медаллари учун кечган ўтиш баҳсида эса ўзбекистонлик спортчи Грузия вакили Тато Григалашвилига ютқазиб қўйди.
Шу тариқа Олимпиаданинг яккалик баҳсларида иштирок этадиган 10 нафар дзюдочидан 6 нафари мусобақа билан хайрлашишга улгурди.
Таэквондо
+67 кг вазнда қатнашган Светлана Осипова 1/8 финалда қозоғистонлик Жанзел Денизга қарши жанг қилди. Ҳисоб 9:9 бўлиб турган вақтда Осипова сўнгги сонияларда қўл зарбасини ўтказиб юборди ва мағлубиятга учради.
Шу тариқа ўзбекистонлик таэквондочиларнинг Токио Олимпиадасидаги иштироки якунланди. Аввалроқ Улуғбек Рашидов олтин медалга эга чиққан бўлса, Никита Рафалович ва Нигора Турсунқулова ўз иштирокини аввалроқ якунлаганди.
Бокс
-69 кг вазн тоифаси вакили Бобоусмон Ботуров ўзбекистонлик боксчилар орасида биринчи бўлиб 1/8 финал баҳсларини бошлаб берди. Унга доминиканлик Поландо Роҳан рақиб бўлди. Бобоусмон жангни ғалаба билан якунлаб, чорак финалга йўл олди. Уни кейинги босқичда Буюк Британия вакили Пет Маккормак кутиб турибди.
Сузиш
Хуршид Турсунов 100 метрга эркин усулда сузиш бўйича саралаш босқичида қатнашди. Хуршид маррани 50.14 сонияда босиб ўтди. Бу эса ярим финал йўлланмаси учун етарли бўлмади ва ўзбекистонлик спортчи Олимпия ўйинларидаги иштирокини якунлади.
Изоҳ (0)