Дзюдо бўйича -81 кг вазн тоифасида Ўзбекистон шарафини ҳимоя қилаётган Шарофиддин Болтабоев 27 июль куни Токио—2020 Олимпиадасининг 1/8 финалида иштирок этди.
Болтабоев ушбу босқичда болгариялик Ивайло Ивановга қарши баҳс юритди. Беллашувнинг асосий вақтида кучлар тенг келди. Golden score’да эса Болтабоев вазари баҳоси билан ғалаба қозонди. Қайд этиш ўринли, Болтабоев 2021 йилнинг март ойида Исроилда ўтказилган мусобақада Ивановни иппон билан мағлубиятга учратганди.
Шарофиддин чорак финалда австриялик Шамил Борчашвилига қарши татамига чиқади. У 1/16 финалда вануатулик Уго Кумбо устидан ғалабага эришганди.
Аввалроқ -63 кг вазн тоифасида ҳаракат қилаётган дзюдочи Фарангиз Ҳожиева Кабо-Верде вакили Сандрин Биллетга мағлуб бўлиб, Олимпиададаги иштирокини якунлаганди.
Изоҳ (0)