23 июль куни соат 09:29 да Тошкентнинг Юнусобод тумани ТҲАЙ кўчаси Уч қаҳрамон айланма йўлида жойлашган электрон реклама қурилмасида ёнғин юзага келди. Бу ҳақда пойтахт ФВБ ахборот хизмати хабар берди.
Маълум қилинишича, ёнғин қутқарув техникалари соат 09:33 да воқеа жойига етиб борган ва соат 09:38 да ёнғин ўчирилган.
Ёнғин натижасида жабрланганлар йўқ. Ҳозирда ёнғиннинг келиб чиқиш сабаблари ўрганилмоқда.
«Ёнғиннинг дастлабки сабаблари аниқланмоқда, аммо мутахассислар айтганидек, бу қисқа туташув оқибатида юзага келган бўлиши эҳтимоли катта», — деб ёзади «Gazeta.uz» Фавқулодда вазиятлар вазирлигига таяниб.
Эслатиб ўтамиз, Тошкент шаҳрида реклама конструкцияларини оммавий бузиб ташлаш ишлари 8 апрелдан бошлаб амалга оширилмоқда. Ташқи реклама объектларининг эгалари конструкциялар қонун бўйича ўрнатилгани, «снос» бўйича кўрсатма «юқоридан» бўлганини маълум қилган. Тадбиркорлар ҳозирга қадар 700 дан ортиқ баннерларни олиб ташлаган ҳукуматнинг ҳаракатини ноқонуний деб айтмоқда, чунки баннерлар суд қарорисиз бузиб ташланмоқда.
Кейинчалик реклама соҳасидаги тадбиркорлар ушбу вазиятни ҳал этишга чақирувчи бир нечта реклама баннерлари ўрнатиш орқали реклама конструкцияларининг ноқонуний бузилишини тўхтатишни сўраб Президент Шавкат Мирзиёевга мурожаат йўллади. Май ойи охирида Тошкент шаҳар ҳокими Жаҳонгир Ортиқхўжаев ёшлар билан учрашувдан кейин журналистнинг шу мавзудаги саволига жавоб бермай кетиб қолганди.
Изоҳ (0)