23-iyul kuni soat 09:29 da Toshkentning Yunusobod tumani THAY ko‘chasi Uch qahramon aylanma yo‘lida joylashgan elektron reklama qurilmasida yong‘in yuzaga keldi. Bu haqda poytaxt FVB axborot xizmati xabar berdi.
Ma’lum qilinishicha, yong‘in qutqaruv texnikalari soat 09:33 da voqea joyiga yetib borgan va soat 09:38 da yong‘in o‘chirilgan.
Yong‘in natijasida jabrlanganlar yo‘q. Hozirda yong‘inning kelib chiqish sabablari o‘rganilmoqda.
“Yong‘inning dastlabki sabablari aniqlanmoqda, ammo mutaxassislar aytganidek, bu qisqa tutashuv oqibatida yuzaga kelgan bo‘lishi ehtimoli katta”, — deb yozadi “Gazeta.uz” Favqulodda vaziyatlar vazirligiga tayanib.
Eslatib o‘tamiz, Toshkent shahrida reklama konstruksiyalarini ommaviy buzib tashlash ishlari 8-apreldan boshlab amalga oshirilmoqda. Tashqi reklama obyektlarining egalari konstruksiyalar qonun bo‘yicha o‘rnatilgani, “snos” bo‘yicha ko‘rsatma “yuqoridan” bo‘lganini ma’lum qilgan. Tadbirkorlar hozirga qadar 700 dan ortiq bannerlarni olib tashlagan hukumatning harakatini noqonuniy deb aytmoqda, chunki bannerlar sud qarorisiz buzib tashlanmoqda.
Keyinchalik reklama sohasidagi tadbirkorlar ushbu vaziyatni hal etishga chaqiruvchi bir nechta reklama bannerlari o‘rnatish orqali reklama konstruksiyalarining noqonuniy buzilishini to‘xtatishni so‘rab Prezident Shavkat Mirziyoyevga murojaat yo‘lladi. May oyi oxirida Toshkent shahar hokimi Jahongir Ortiqxo‘jayev yoshlar bilan uchrashuvdan keyin jurnalistning shu mavzudagi savoliga javob bermay ketib qolgandi.
Izoh (0)