Қирғизистон афғонистонлик қирғизларни қабул қилишга тайёр ва ушбу масалада Бирлашган Миллатлар Ташкилоти ҳамда Тожикистондан ёрдам сўрайди. Бу ҳақда Қирғизистон Ташқи ишлар вазирлиги матбуот хизматига таяниб, Asia-Plus хабар берди.
«Қирғизистон Республикаси Ташқи ишлар вазирлиги БМТнинг Марказий Осиёдаги қочқинлар иши бўйича Олий комиссарлиги бошқармасининг Минтақавий идорасига ва унинг Қирғизистондаги бюросига Тожикистон Республикасида вақтинча бўлиб турган афғонистонлик қирғизлар билан боғлиқ вазият юзасидан мурожаат қилди ҳамда уларни Тожикистондан Қирғизистонга эвакуация қилишни ташкил қилишда ёрдам сўради», — дейилади матбуот хизмати хабарида.
Шунингдек, Қирғизистон ТИВ Тожикистон ТИВга афғонистонлик қирғизларнинг қирғиз-тожик давлат чегарасидаги назорат-ўтказиш пунктларигача қаршиликсиз етиб олишида кўмак бериш тўғрисида илтимоснома юборди.
«Айни пайтда Қирғизистон ТИВ Тожикистон ҳукумати ва БМТ Қочқинлар ишлари бўйича Олий комиссарлиги билан афғонистонлик қирғизларни Қирғизистон республикаси ҳудудига эвакуация қилиш бўйича иш олиб бормоқда. Ўз навбатида, Қирғизистон томони Тожикистон ҳукумати республиканинг халқаро мажбуриятларига мувофиқ эвакуация масаласини тезкор ҳал қилиш учун максимал даражада ёрдам беришини кутмоқда», — дея ўз хабарини якунлайди матбуот хизмати.
13—14 июль кунлари Тожикистондаги Тоғли Бадахшон мухтор вилоятининг Мурғоб тумани Қизил-Работ қишлоқ жамоати орқали қирғиз миллатига мансуб 347 нафар Афғонистон фуқаролари Тожикистон чегарасини кесиб ўтганди.
Уларнинг барчаси Афғонистоннинг Бадахшон вилояти, Вахон туманидаги Андемин қишлоғи аҳолиси. Давлат чегарасини кесиб ўтишда икки гўдак вафот этган. Ҳозирда қочқинлар Қизил-Работ қишлоқ жамоатининг Чоштепа ва Дуютук участкаларига жойлаштирилган.
Изоҳ (0)