Жонс Ҳопкинс университети маълумотларига кўра, дунёда коронавирусга чалинганлар сони 188 925 223 кишига етди, шуларнинг 4 066 561 нафари вафот этган. Касалланганлар сони бўйича доимгидек, АҚШ (33,9 миллион), Ҳиндистон (31 миллион), Бразилия (19,2 миллион), Франция (5,8 миллион) ва Россия (5,8 миллион) етакчилик қилмоқда.
Париждаги Эйфель минораси бугун, 16 июлдан ташриф буюрувчилар учун очилади.
«Биз кекса хонимни назокат ва ғамхўрлик билан уйғотишга тайёрланяпмиз, у ўз-ўзини яккалаш режими туфайли 250 кун уйқуда бўлди», — дея миноранинг очилишини изоҳлади унга операторлик қилувчи компания раҳбари Жан-Француа Мартин.
20 июлга қадар Эйфель минораси барча учун очиқ бўлади, аммо 21 июлдан бошлаб коронавирусга қарши эмланмаган фуқаролар киритилмайди. Мартиннинг сўзларига кўра, яқин орада Франциядаги барча сайёҳлик нуқталарида шундай қоида амал қилишни бошлайди.
Сўнгги уч ҳафта мобайнида минора раҳбарияти лифтларни йўловчисиз ишлатиб кўриб, хавфсизликни текширди. Эйфелдаги ишларни қайта тиклаш учун аввалроқ мажбурий таътилга чиқариб юборилган 350 киши ишга қайтарилди.
COVID-19 Хитойнинг Ухань шаҳридаги лабораторияда пайдо бўлган ва сизиб чиқиши туфайли тарқалиб кетган, деган версияни истисно қилишга ҳали эрта. Бу ҳақда Жаҳон соғлиқни сақлаш ташкилоти (ЖССТ) раҳбари Тедрос Аданом Гебрейесус маълум қилди.«Менинг ўзим лаборант бўлганман, мен иммунологман, лабораторияда ишлаб кўрганман ва лабораторияларда кутилмаган ҳодисалар бўлишидан хабарим бор. Шундай бўлиб туради», — дея аниқлик киритди ЖССТ раҳбари.
Гебрейесус қайд этишича, пандемия қандайдир тарзда лабораториялар билан боғлиқ ёки боғлиқ эмаслигини тушуниш учун бўлиб ўтган ҳодисани текшириш жуда муҳим. «Бизга ушбу лабораториядаги вазият пандемиягача ва пандемия бошида қандай бўлгани ҳақидаги маълумот, тўғридан-тўғри ахборот керак», — деди у ва Хитойнинг ҳамкорликка тайёрлиги бу ерда ҳал қилувчи рол ўйнашини айтди. «Агар биз тўлиқ маълумот олсак, лаборатория билан боғлиқ версияни истисно қилишимиз мумкин», — деди ЖССТ раҳбари. Шунингдек, у Хитойни очиқ ва шаффоф ҳамкорликка чақирди, «айниқса, биз пандемиянинг илк кунларида сўраган дастлабки маълумотлар борасида», деди у.
Бирлашган Араб Амирликлари (БАА)нинг Абу-Даби амирлиги ҳукумати коронавирус тарқалиши хавфининг олдини олишга қаратилган янги чоралар ҳақида эълон қилди, улар 19 июль, душанба кунидан амал қилишни бошлайди.Абу-Дабига сўнгги 48 соат ичида топширилган манфий натижали ПЗР-тест ёки бир кун ичида олинган экспресс ПЗР-тест билан кириш мумкин. Бу ҳам чет элликлар, ҳам амирлик резидентлари учун амал қилади.
Амирликда муайян вақт давомида қолиш истагида бўлганлар COVID-19’га нисбатан тестлардан такроран ўтади.
Душанбадан Абу-Даби ҳудудида 00:00 дан 05:00 гача комендантлик соати жорий қилинади, бу вақтда кўчаларда транспорт ҳаракати тўхтатилади.
Савдо марказлари, кинотеатрлар, пляжлар ва умумий овқатланиш муассасаларига ташриф буюрувчилар сонига чекловлар киритилмоқда.
Изоҳ (0)