Катта круиз кемалари учун Венеция марказига кириш 2021 йил 1 августдан тақиқланади. Италия Вазирлар Маҳкамаси томонидан тегишли қонун қабул қилинди, деб ёзади маҳаллий La Repubblica нашри.
Тақиқ қуйидаги мезонлардан камида биттасига жавоб берадиган лайнерларга тааллуқли бўлади: 25 минг тоннадан ортиқ сувни силжитадиган, узунлиги 180 метрдан ёки баландлиги 35 метрдан ортиқ кемалар. Тахминан, 200 йўловчига мўлжалланган круиз кемалари шаҳар марказига кириш ҳуқуқини сақлаб қолади, дейди La Repubblica.
1 августдан йирик круиз кемалари Венеция қўлтиғининг нариги томонида жойлашган Маргера саноат портига тўхтайди. Йўловчи кемаларини қабул қилиш учун портни қайта жиҳозлаш режалаштирилган. Бу амалга оширилгунга қадар круиз кемалари ўз йўналишларида Венецияни четлаб ўтиши керак, деб ёзади The Guardian.
Венеция аҳолиси ва халқаро ҳамжамият кўп йиллардан буён йирик кемаларнинг шаҳар марказидан ўтишини тақиқлашга чақириб, улар шаҳар каналларини ифлослантираётгани, экотизимларини йўқ қилаётгани ва тарихий биноларга таҳдид солаётганидан шикоят қилиб келади.
2021 йил июнь ойида ЮНЕСКО шаҳар марказига кириб келаётган круиз кемалари туфайли Венецияни жаҳон меросининг хавф остидаги объектлари рўйхатига киритиш билан таҳдид қилди.
Изоҳ (0)