Афғонистон президенти Ашраф Ғани фикрича, яқин уч ой ичида мамлакатдаги хавфсизлик сезиларли даражада мустаҳкамланади. У Афғонистон шимолидаги Балх вилоятининг Мозори Шариф шаҳрига сафари чоғида шундай баёнот билан чиқиш қилди, деб ёзади «ТАСС».
«Мамлакатда хавфсизлик билан боғлиқ вазият яқин уч ой ичида анча яхшиланади. ‘Толибон’ устидан ғалаба қозонамиз, улар эгаллаб олган ҳудудларнинг барчаси қайтариб олинади», — деди у.
Ашраф Ғани Мозори Шарифда фаол фуқаролар, журналистлар ва маҳаллий маъмурият ходимлари билан кўришди. У алоҳида қайд этишича, «Толибон»ни енгиш учун миллий бирдамлик зарур.
Сўнгги ойлар ичида Балх вилоятининг тўққизта тумани «Толибон» назорати остига ўтди. Шундай бир пайтда вилоят аҳоли пунктларида радикалларга қарши туриш учун кўнгилли аскарлар гуруҳлари пайдо бўлди.
Балх губернатори Муҳаммад Фарҳод Азимийнинг сўзларига кўра, хавфсизлик кучлари, шу жумладан, вилоят шимолидаги Ҳайратон портини ҳимоя қилиш режаларини муҳокама қилмоқда. Ушбу порт ва Амударё дарёсидаги чегара пости Ўзбекистон билан чегарада жойлашган.
Афғонистондан НАТО қўшинларини олиб чиқиш 29 апрелда бошланган, АҚШ ва «Толибон» ўртасида тузилган келишувга биноан жараён кузда якунланиши керак. Сўнгги маълумотларга кўра, АҚШ Афғонистондаги ҳарбий контингентининг 90 фоиздан кўпроғини олиб чиқиб кетди.
Аввалроқ «Толибон» барча чет эл қўшинлари Афғонистонни ўз муддатида тарк этишини талаб қилгани ҳақида хабар берилганди. АҚШ Афғонистондан ўз қўшинларини олиб чиқиш амалиёти август охирига қадар тугашини маълум қилди.
Associated Press хабарига кўра, АҚШ қўшинларининг асосий қисмини олиб чиққанидан кейин Афғонистонда 650 га яқин америкалик ҳарбийни қолдирмоқчи. Таъкидланишича, Афғонистонда қоладиган ҳарбийлар дипломатларнинг хавфсизлигини таъминлайди.
Бугунга қадар Германия, Италия ва Австралия Афғонистондан ўз қўшинларини олиб чиқишни якунлади.
Изоҳ (0)