17 июнь куни Жиноят ишлари бўйича Конимех туман судининг ҳукми билан қасддан одам ўлдириш жиноятини содир этган шахсга 10 йил муддатга озодликдан маҳрум қилиш жазоси тайинланди. Бу ҳақда «ЗўрТВ» телеканалининг «Бу кун» дастурида маълум қилинди.
Маълумотларга кўра, А. исмли фуқаро йўл-транспорт ҳодисасига учраган Nexia русумли машинасини тузатиш учун устахонага борган. Бироқ уста машинани тузатишдан кўра уни сотиб олиш таклифини берган. Автомобиль 22 миллион сўмга баҳоланган ва уста фуқаро А.га дастлаб 1000 доллар ва 1 миллион сўм берган.
Вақт ўтиб, 16 март куни фуқаро А. қолган пулни ундиришга устанинг уйига келган ва уникида спиртли ичимлик ичиб, овқатланган. Ўртада ўзаро жанжал келиб чиққан ва А. машина устасининг юзига бир маротаба урган. Уста эса ошхона пичоғини йигитнинг чап кўкрак соҳасига бир марта санчиб олган. Жабрланувчи олган тан жароҳатлари оқибатида ҳалок бўлган.
Суд ҳайъати судланувчи, жабрланувчи ва гувоҳларнинг кўрсатмаларини ўрганиб чиқиб, ишда мавжуд далилларга баҳо берган ҳолда ҳукм чиқарган. Судланувчига нисбатан 10 йил муддатга озодликдан маҳрум этиш жазоси тайинланган.
Аввалроқ Олмалиқда 22 ёшли йигит ўзидан 3 ёш катта шахсни пичоқлаб, ўлдириб қўйгани, Сурхондарёда онасини ҳақорат қилган қариндошини пичоқлаб ўлдирган шахсга жиноий иш очилгани, Бухорода 63 ёшли эркак ер талашиб, синглисини пичоқлаб қўйгани, Жиззахда хотинини хиёнат қилишда айблаб, уни ўлдириб қўйган шахс 14 йилга қамалгани тўғрисида хабар берилганди.
Изоҳ (0)