Тошкентнинг марказий кўчаларида 15 июль куни эрталабдан бошлаб вақти-вақти билан транспорт ҳаракати чекланмоқда, деб ёзмоқда «Gazeta.uz». Бу «Марказий ва Жанубий Осиё: минтақавий боғлиқлик. Таҳдидлар ва имкониятлар» мавзусидаги халқаро конференция иштирокчилари, делегациялар келиши билан боғлиқ бўлиб, асосий тадбирлар 16 июлга режалаштирилган.
Форумнинг юқори мартабали хорижий иштирокчилари орасида Афғонистон президенти, Покистон бош вазири, Марказий ва Жанубий Осиё мамлакатлари ва бошқа давлатларнинг ташқи ишлар вазирлари ва расмийлари, халқаро ва минтақавий ташкилотлар ва молия институтлари раҳбарлари бор.
Тошкент шаҳар ИИББ бир неча кун олдин Tashkent City бизнес маркази атрофидаги кўчалар автотранспорт ҳаракатланиши учун ёпиқ бўлиши ҳақида хабар берган эди. Бироқ ҳозирда вақти-вақти билан катта тирбандликлар шаҳарнинг турли туманларидаги бошқа кўчаларда ҳам кузатилмоқда.
Шунингдек, шаҳар устидан вертолётлар айланмоқда, бу шаҳар аҳолиси учун ноодатий ҳолат ва вазиятдан хабардор бўлмаган фуқароларда саволлар туғдирмоқда.
«Тошшаҳартрансхизмат» (ТШТХ) матбуот хизмати Tashkent City ҳудуди атрофида автобуслар ҳаракатланиш йўналиши ўзгариши ҳақида олдинроқ тушунтириш берган эди. Бу 53, 64, 65 ва 141-сонли автобус йўналишларига тегишли. Лекин йўллар ёпиқлиги боис йўловчилар шаҳарнинг бошқа қисмларида ҳам автобусларни узоқ вақт кутишларига тўғри келмоқда. Бу ҳақда улар огоҳлантирилмаган эди.
ТШТХ матбуот хизматининг «Gazeta.uz»га маълум қилишича, ушбу вазият вақтинча давом этиб, кўчалардаги ҳаракатланиш узоғи билан 10 дақиқага чекланмоқда, шу сабабли автобусларнинг (юқорида келтирилганларидан ташқари) йўналишига ўзгартиришлар киритилмаган.
Хабарда таъкидланишича, Тошкент расмийлари маълум йўлларнинг ёпилиши ҳақида огоҳлантириб борса ҳам, юқорида келтирилган кутилмаган йўллар ёпилишини олдиндан башорат қилиш қийин. Автобус ҳайдовчилари «Gazeta.uz»га йўлдаги вазият ўзгариши ҳақида кўпинча маълумотга эга бўлмасликларини ва йўналишни ўзгартириш бўйича ўзаро келишиб олишга мажбур бўлишларини билдирган.
«Gazeta.uz» ҳайдовчиларга навигатор иловалари билан йўлни текширишни, жамоат транспорти йўловчиларига эса улар йўлда режаларидан кўпроқ вақт кетказишлари мумкинлигини инобатга олишларини тавсия этмоқда.
Изоҳ (0)