Тошкентда 15 июль куни «Марказий ва Жанубий Осиё: минтақавий боғлиқлик. Таҳдидлар ва имкониятлар» мавзусидаги юқори даражали халқаро конференция доирасида «Марказий Осиё мамлакатлари — АҚШ» (S5+1) форматидаги навбатдаги йиғилиш бўлиб ўтди. ТИВ расмий вакилининг хабар беришича, учрашувда «S5+1» шакли доирасидаги ҳамкорликнинг долзарб жиҳатлари муҳокама қилинди, халқаро сиёсат ва минтақавий хавфсизликни таъминлаш масалалари борасида фикр алмашилди.
«Gazeta.uz»нинг ёзишича, йиғилишда иштирок этган АҚШ президентининг ички хавфсизлик масалалари бўйича маслаҳатчиси Элизабет Шервуд-Рендалл форумида АҚШ якка ёки икки томонлама эмас, ҳамкорликда кўпроқ иш қилиши мумкинлигини таъкидлади.
«S5+1 форумида биз якка ёки икки томонлама эмас, ҳамкорликда кўпроқ иш қилишимиз мумкин. Ушбу ёндашув президент (Жо) Байденнинг эътибори марказида. Бугун биз дуч келаётган — COVID-19 пандемиясидан тортиб иқлим ўзгаришигача ва халқаро терроризм бўйича муаммолар — битта мамлакатнинг ўзи ҳал қила олиши учун жуда қийин», — деган Элизабет Шервуд-Рендалл.
Америка президентининг маслаҳатчиси август ойининг охирида АҚШнинг Афғонистондаги ҳарбий миссияси 20 йилдан сўнг якунланишини эслатди. «Биз муносабатларнинг янги босқичига ўтамиз. Президент Байден айтганидек, бизнинг аскарларимиз уйга қайтаётганларида Афғонистон ҳукумати ва афғон халқига бўлган садоқатимиз сақланиб қолмоқда», — дея қўшимча қилган у.
«Биз Афғонистон миллий мудофаа кучларига хавфсизлик, шунингдек, ривожланиш ва гуманитар ёрдам кўрсатишда давом этамиз. Биз Қўшма Штатларга ва иттифоқчиларимиз ҳамда шерикларимиз хавфсизлигига, шу жумладан, сизларнинг мамлакатларингизга таҳдид солувчи террористик гуруҳларга қарши агрессив ҳаракатларимизни давом эттирамиз», — таъкидлаган Элизабет Шервуд-Рендалл.
«Шунингдек, биз афғон халқига муносиб тинчлик олиб келадиган ва Афғонистон келажагини қўллаб-қувватлаш учун янада кучли минтақавий ва халқаро базани яратадиган сиёсий ечимга эришиш учун музокараларни қўллаб-қувватлашни давом эттирамиз. Бу Афғонистон халқи ва жамоавий хавфсизлигимиз учун биргаликда қилишимиз керак бўлган ишдир», — деган у.
Бундан ташқари, АҚШ президенти маслаҳатчисининг сўзларига кўра, ҳозирда мамлакат вакциналарнинг дунё бўйлаб тарқалишини тезлаштириш учун агрессив кампанияни амалга оширмоқда. «Биз COVAX дастурига 500 миллион дозани ваъда қилдик ва вакцина ушбу минтақага ҳам етиб келади», — дея қўшимча қилган у.
Эслатиб ўтамиз, 15 июль куни «Марказий ва Жанубий Осиё: минтақавий боғлиқлик. Таҳдидлар ва имкониятлар» мавзусидаги халқаро конференция бошланади. Унда 400 дан ортиқ хорижий меҳмонлар иштирок этиши кутилмоқда. Президент Шавкат Мирзиёев ташаббуси билан ўтказилаётган конференция Марказий ва Жанубий Осиё давлатлари ўртасидаги дўстона алоқалар, ишонч ва яхши қўшничилик муносабатларини мустаҳкамлашга қаратилган.
Изоҳ (0)