Бармоқларга қотирилиб, нам қўлдан электр энергиясини ишлаб чиқаришга қодир эгилувчан кичик пластир яратилди, деб хабар беради Hi-Tech.Mail.ru.
Калифорния университети ихтирочиларининг таъкидлашича, янги қурилма инсондан ажраладиган терни йиғишга (фойдаланувчи ухлаган ёки кундалик иш билан шуғулланаётган вақтида) ва ундан электр энергиясини ишлаб чиқаришга қодир.
Қурилманинг прототипи яратилган, бироқ у ҳозирча фақат кичик миқдорда энергия тўпламоқда. Смартфонни қувватлантириш учун пластирни қўлда уч ҳафтага яқин тақиб юришга тўғри келади. Олимлар мазкур қурилманинг имкониятларини келажакда яхшилашга умид қилмоқда.
Тасма бармоқда 10 соат тақиб юрилса, қўл соатлари 24 соат ишлаши учун етадиган энергия ҳосил бўлади. Гап фақат битта бармоқдаги пластир ҳақида кетмоқда. Тадқиқотчиларнинг сўзларига кўра, қурилма бошқа бармоқларга ҳам уланса, энергия ҳажми ўн баравар ортади.
Энергия ишлаб чиқаришга мўлжалланган аксарият қурилмалар фойдаланувчидан интенсив машқлар бажаришни ёки қуёш нури ёки ҳароратини талаб этади. Тасма-пластир эса электр энергиясини ишлаб чиқаришда пассив тизимдан фойдаланади.
Аввалроқ Сингапурда соялардан электр энергиясини ишлаб чиқарадиган қурилма яратилгани тўғрисида хабар берилганди.
Изоҳ (0)