Халқ таълими вазирлиги мамлакатда таълим тизимини такомиллаштириш, уни янада юқори савияга олиб чиқиш, амалга оширилаётган ислоҳотлар натижадорлигини ошириш борасида амалга оширилаётган тизимли ишлар ҳақида маълумот берди.
«Хусусан, сўнгги 5 йиллик давр мобайнида тизимда бир қатор салмоқли ислоҳотлар амалга оширилди. Ўқитувчининг жамиятда мавқейини оширишга ҳар томонлама ҳаракат қилиниши натижасида халқ таълими тизимига қарийб 45 минг нафар эркак ўқитувчи қайтди», — дейилади хабарда.
Ўрта махсус маълумотли ўқитувчилар сони 64 892 дан 46 214 нафарга (30 фоизга) камайган.
2018—2019 йилларда Ўзбекистонда халқ таълими тизимидаги жами ўқитувчилар сони 445 638 нафарни ташкил этган бўлса (эркак ўқитувчилар сони — 133 207 нафар), 2020—2021 йилдан ушбу кўрсаткич 501 044 нафарни ташкил этган. Бунда эркак ўқитувчилар сони 159 104 нафарга етган.
Эслатиб ўтамиз, 2020 йилнинг декабрида халқ таълими вазири Шерзод Шерматов 2030 йилгача Ўзбекистон таълим бериш сифати бўйича топ-30 таликка кириши кўзда тутилганини маълум қилганди.
Изоҳ (0)