Тожикистон Афғонистонга электр энергиясини экспорт қилишда давом этмоқда

Тожикистон Афғонистондаги сиёсий вазиятга қарамай, мамлакатга электр энергияси етказиб беришда давом этмоқда. Бу ҳақда Тожикистон энергетика ва сув ресурслари вазири Далер Жумага таяниб, Asia-Plus хабар берди.

Вазирнинг сўзларига кўра, икки мамлакат электр компаниялари 2021 йилда Афғонистонга Тожикистондан тахминан 1,5 миллиард киловатт/соат миқдорида электр энергиясини экспорт қилиш бўйича шартнома имзолаган.

«Ҳозирча қўшни давлатга электр энергиясини етказиб бериш жадвалидан орқада қолиш кузатилмаган, экспорт белгиланган режалар доирасида амалга оширилмоқда», — деди вазир.

Унинг сўзларига кўра, электр энергиясини етказиб бериш, асосан, баҳор-ёз мавсумида — майдан сентябргача амалга оширилади.

Энергетика вазирлигининг маълумотларига кўра, 2021 йилнинг биринчи ярмида қўшни мамлакатларга 917 миллион киловатт/соатдан ортиқ энергия экспорт қилинган, бу 2020 йилнинг шу даврига нисбатан 5 фоизга кўп.

2021 йилнинг биринчи ярмида Тожикистонда 10 миллиард киловатт/соатдан кўпроқ электр энергияси ишлаб чиқарилди, бу 2020 йилнинг шу даврига нисбатан 170 миллион киловатт/соатга кам.

Тожикистоннинг Афғонистонга юборадиган экспортининг қарийб 65 фоизини электр энергияси ташкил этади. Тожикистонлик энергетиклар 2020 йили электр энергияси экспортидан тахминан 45 миллион доллар даромад олган.

Афғонистон Тожикистон электр энергиясининг ҳар киловаттига 3 сент (110 кВт электр узатиш линиялари орқали юбориладиган электр учун) ва 4,5 сент (220 кВт электр узатиш линиялари орқали юбориладиган электр учун) тўлайди. Электр энергиясининг катта қисми 220 кВт қувватли линиялар орқали узатилади.

Тожикистон Афғонистондан ташқари, баҳор-ёз даврида Ўзбекистонга ҳам электр энергияси экспорт қилади.