Қашқадарёнинг Шаҳрисабз шаҳридаги «Беруний» оромгоҳида 60 ўринли коронавирус билан касалланганларни саралаш ва тақсимлаш маркази ташкил этилди, деб хабар бермоқда шаҳар ҳокимлиги матбуот хизмати.
Қайд этилишича, беморларни қабул қилишга тайёр ҳолга келтирилган ушбу марказда 49 турдаги дори-дармонлар захираси яратилган.
Nasafnews тўплаган маълумотга кўра, айни пайтда вилоятда яна 3 та тақсимлаш маркази қайта очилган. Булар Қарши шаҳридаги фтизиатрия ва пулмонология маркази , «Геолог» спорт мажмуаси ва Қарши ихтисослаштирилган олимпия захиралари мактаб интернатида фаолият кўрсатмоқда.
Тақсимлаш марказларида коронавирус беморлари билан мулоқотда бўлганлар ва коронавирус юқтирганликда гумон қилинган фуқароларга тиббий ёрдамлар кўрсатилмоқда. Шунингдек, вилоят юқумли касалликлар шифохонасида коронавирус юқтирган беморлар даволанмоқда.
Эслатиб ўтамиз, Ўзбекистонда касалланиш ҳолатлари ортаётгани туфайли ковид-марказлар қайта очилмоқда. Хусусан, Тошкентда ДХХ тасарруфидаги «Ёшлик» спорт мажмуасида, ИИВ тасарруфидаги «Универсал» спорт мажмуасида 700 койка-ўринга мўлжалланган ковид-марказ, «Ўзэкспомарказ»да 750 ўринли коронавирусга чалинган беморларни даволашга ихтисослашган марказ қайтадан ташкил этилди. Учтепа туманидаги спорт саройида COVID-19 билан касалланган беморларни даволаш учун 100 ўринга мўлжалланган захира маркази, Жаҳон тиллари университети талабалар турар жойида 300 ўринга мўлжалланган захира маркази тайёрланмоқда.
Самарқандда ҳам 1000 ўринли саралаш ва тақсимлаш маркази ўз фаолиятини қайта бошлади. Наманганда 400 беморни даволашга мўлжалланган «Баркамол авлод» спорт мажмуасида ташкил этилган даволаш ва тақсимлаш маркази фаолияти қайта тикланди.
Изоҳ (0)