Тошкентда 15—16 июль кунлари бўлиб ўтадиган «Марказий ва Жанубий Осиё ўзаро минтақавий боғлиқлик. Таҳдидлар ва имкониятлар» халқаро конференцияси Ўзбекистоннинг ташқи майдонда ва минтақада олиб бораётган фаол, очиқ ва прагматик руҳдаги сиёсатининг мантиқий давомидир, дейди Президент ҳузуридаги Стратегик ва минтақалараро тадқиқотлар институти (СМТИ) эксперти Азиз Каримов.
Азиз Каримовнинг таъкидлашича, Ўзбекистон минтақада янги сиёсий ва иқтисодий воқеликни яратишга муваффақ бўлди ва энди Марказий Осиё атрофида барқарорлик камарини мустаҳкамлаш учун қулай шароит ҳозирламоқда. Унинг фикрича, бундай ўзгаришлар Марказий Осиё мамлакатлари учун ташқи дунё, хусусан қўшни минтақалар билан алоқаларини янги босқичга олиб чиқиш учун замин ҳозирлайди.
Ушбу тадбирдан кутилаётган асосий мақсадлардан яна бири — Марказий ва Жанубий Осиё мамлакатлари ўртасида иқтисодий интеграцияни йўлга қўйиш ва бу жараёнларга Афғонистонни кенг жалб этишдир. «Шу боис минтақалараро ўзаро боғлиқликнинг тикланишидан асосий фойда олувчилардан бири Афғонистон бўлади», — дейди СМТИ вакили. Чунки географик жиҳатдан Афғонистонга интеграция жараёнларини таъминлашда марказий ўрин берилган.
Минтақалараро иқтисодий интеграция биринчи навбатда Афғонистондаги сиёсий ва ижтимоий-иқтисодий вазиятга ижобий таъсир кўрсатади, чунки барча кўзда тутилган минтақалараро йирик иқтисодий лойиҳаларнинг рўёбга оширилиши Афғонистондаги барча ички сиёсий кучлар, қўшни мамлакатлар ва ташқи етакчи давлатлар учун афғон заминида тинчлик ҳукм суришидан манфаатдорлик ҳиссини янада оширади, дейди эксперт.
«Ҳозирги кунда Афғонистон жуда муҳим тарихий босқичида турибди — халқаро контингентнинг ушбу мамлакат ҳудудидан олиб чиқилиши Афғонистон учун суверен, мустақил давлат бўлишга имконият яратади. Ўз навбатида, конференция Афғонистонда тинчликка эришишнинг мақбул формуласини топишга ўзига хос майдон вазифасини бажариши кутилмоқда», – деди Азиз Каримов.
Аввалроқ Тошкентдаги бўлажак халқаро конференцияда Афғонистон президенти Ашраф Ғани, Покистон бош вазири Имрон Хон, Европа Иттифоқининг ташқи ишлар ва хафсизлик сиёсати бўйича олий вакили, Еврокомиссия вице-президенти Жозеп Боррел, АҚШнинг Афғонистон бўйича махсус вакили Залмай Халилзод иштирок этиши кутилаётгани ҳақида хабар берилган эди. Тадбирда БМТ бош котиби Антониу Гуттериш иштирокчиларга видеомурожаат йўллаши кутилмоқда.
Изоҳ (0)