Ўзбекистон товар–хом ашё биржасида пахта ёғи ва бензин нархи тушди

Ўзбекистон товар–хом ашё биржасида пахта ёғи 10 фоизга арзонлашди, дея хабар бермоқда биржа матбуот хизмати.

Ўтган ҳафта давомида, яъни 5–11 июль кунлари «Ўзбекистон республика товар-хом ашё биржаси»нинг барча савдо платформаларида 1 триллион 661 миллиард 300 миллион сўмлик товарлар сотилган бўлиб, бу аввалги ҳафтага нисбатан 7,5 фоизга камдир. Бунда сотувларнинг 84,7 фоизи – биржа савдолари; 1,8 фоизи – кўргазма-ярмарка савдолари; 12,9 фоиз – электрон давлат харидлари ва 0,6 фоиз – авторақамларнинг онлайн-аукционига тўғри келди.

Кўриб чиқилаётган даврда очиқ биржа савдолари орқали жами 1 триллион 407 миллиард 4 миллион сўмлик товар ресурслари сотилди. Сотувчи корхоналар маҳсулотларни тасдиқланган жадвалларга риоя қилган ҳолда биржа савдоларига қўйди:

Пахта ёғи

Ўтган ҳафтада биржанинг пахта ёғи бозорида нархлар пасайди. Ҳафта давомида биржа савдоларига 2 577 тонна пахта ёғи қўйилди ва улардан 973 тоннаси, яъни 37,7 фоиз сотилди. Ўртача харидорлар сони 147 кишини ташкил қилди. Ўртача кунлик сотув ҳажмлари эса 195 тоннага тенг бўлди.

Кўриб чиқилаётган даврда пахта ёғининг барча категорияси бўйича шаклланган кунлик ўртача нархлар маҳсулотнинг бир тоннаси учун 16 миллион 670 минг 700 сўмдан 14 миллион 984 минг 300 сўмгача, яъни 10,1 фоиз га пасайди.

Цемент

Биржанинг цемент бозорида ички талаб ўсишда давом этмоқда. Ўтган ҳафта мобайнида биржа савдоларига 332 552 тонна цемент қўйилди ва улардан 193 788 тоннаси, яъни 58,3 фоиз сотилди. Ўртача кунлик сотув ҳажмлари 38,7 минг тоннани ташкил қилди.

Кўриб чиқилаётган даврда цементнинг барча маркалари бўйича шаклланган кунлик ўртача нархлар маҳсулотнинг бир тоннаси учун 518,6 минг сўмдан 518,0 минг сўмгача пасайди.

Бензин

Ўтган ҳафтада биржада автомобиль бензинининг нархи бироз пасайди. Ўтган ҳафта мобайнида биржа савдоларига 25 миллион 898 минг тонна бензин қўйилди ва улардан 19 миллион 375 минг 400 тоннаси, яъни 74,8 фоиз сотилди. Ўртача кунлик сотув ҳажмлари 3,9 минг тоннани ташкил қилди.

Кўриб чиқилаётган даврда Аи-80 русумли автомобиль бензиннинг кунлик ўртача нархлар маҳсулотнинг бир тоннаси учун 7 миллион 109 минг 800 сўмдан 7 миллион 96 минг 900 минг сўмгача пасайди.

Эслатиб ўтамиз, Ўзбекистон Президентининг 2020 йил 4 апрелдаги ПҚ-4664-сон қарорига мувофиқ «Ўзбекнефтгаз» АЖ тасарруфидаги Бухоро нефтни қайта ишлаш заводи томонидан биржа савдоларига қўйиладиган автомобиль бензинининг бошланғич нархлари, жаҳон биржалардаги Brent нефтининг котировкаларидан келиб чиқиб шаклланади.

Турли манбаларда келтиришича автомобиль бензинининг бир тоннаси ўртача 1293–1370 литрни ташкил қилади.

Бундан аввал Ўзбекистон марказий деҳқон бозорларида сабзи нархи пасайгани ҳақида хабар берилганди.