Ҳукумат қарори билан Дилшод Неъматович Сатторов Инвестициялар ва ташқи савдо вазирлиги ҳузуридаги Ўзбекистон техник жиҳатдан тартибга солиш агентлиги бош директори этиб тайинланди. Бу ҳақда Адлия вазирлиги хабар қилди.
Маълумот учун, Дилшод Сатторов 1976 йилда Наманган вилоятида туғилган. Маълумоти олий. 1998 йилда Андижон муҳандислик-иқтисодиёт институтини, 2010 йилда – Ўзбекистон Президенти ҳузуридаги Давлат ва жамият қурилиши академиясини тамомлаган.
У 2016–2018 йилларда Ўзбекистон Молия вазирлиги Ғазначилик бошлиғи – вазир ўринбосари, 2018 йил 20 августдан ушбу тайинловга қадар Ўзбекистон стандартлаштириш, метрология ва сертификатлаштириш агентлиги бош директори лавозимида ишлаб келаётган эди.
Эслатиб ўтамиз, Техник жиҳатдан тартибга солиш агентлиги Шавкат Мирзиёевнинг 3 июнь куни имзолаган фармони билан ташкил этилган. Агентлик техник жиҳатдан тартибга солиш ва метрология соҳаларида давлат сиёсатини амалга оширувчи республика давлат бошқаруви органи ҳисобланади.
Бундан аввал Бухоро вилояти Соғлиқни сақлаш бошқармаси бошлиғи ўзгаргани, Ўзбекистоннинг Япониядаги янги элчиси ҳамда Давлат божхона қўмитаси раисига янги ўринбосар тайинлангани ҳақида хабар берилганди.
Изоҳ (0)