- АҚШ — жами касалланганлар сони 33,8 миллион киши;
- Ҳиндистон — 30,8 миллион;
- Бразилия — 19 миллион;
- Франция — 5,8 миллион;
- Россия — 5,7 миллион.
Москвага етказиб берилган М.П. Чумаков номидаги марказ томонидан ишлаб чиқилган ва ишлаб чиқарилаётган коронавирусга қарши «КовиВак» вакцинаси бир кеча-кундузда тугади.
10 июль куни «КовиВак» 14 та вакцинация пунктига етказилган, шаҳар ҳукумати вакцинанинг чекланган миқдорда экани ҳақида огоҳлантирган — ҳар битта пунктга кўпи билан 850 та дозадан тўғри келган.
Айнан шу вакцинани олиш учун одамлар узун навбатларга тизилган, аммо дори тугаб қолган.
Мутахассисларнинг «КовиВак» атрофидаги шов-шув бўйича фикрлари турлича. Версиялардан бирига кўра, вакцина чекланган миқдорда ишлаб чиқарилаётгани сабабли эътиборни тортмоқда. Аммо экспертларнинг барчаси вакцина ҳали клиник синовлар босқичида тургани ва унинг самарадорлиги бўйича ҳозирча аниқ маълумотлар йўқлиги ҳақида огоҳлантирмоқда.
Россияда ўтган бир кеча-кундузда COVID-19 оқибатида 710 киши вафот этди. Тезкор штаб маълумотларига кўра, мамлакатда кетма-кет бир ҳафтадан буён 700 дан ортиқ кунлик ўлим қайд этилмоқда. Коронавирус оқибатидаги энг кўп ўлимлар Москва ва Санкт-Петербургда кузатилмоқда.
Шунингдек, кетма-кет уч кундан буён Россияда ҳар куни 25 мингдан ортиқ одамда вирус аниқланмоқда.
Таиландда Хитойнинг Sinovac вакцинаси билан COVID-19’га қарши эмланган ҳамшира кўп ўтмай вафот этди.30 ёшли ҳамшира Хитой вакцинасининг иккала дозасини ҳам олган, аммо коронавирус билан касалланиб қолган ва бир ҳафтадан кейин вафот этган. Бу ҳақда унинг қариндоши Facebook орқали маълум қилган.
Таиланд Соғлиқни сақлаш вазирлиги маълумотларига қараганда, мамлакатда Синов билан тўлиқ эмланган 677 348 тиббий ходимдан 618 нафари (1 фоиздан камроғи) коронавирусни юқтириб олган. Мутахассислар вакцинани учта дозада олишни тавсия қилган, кўриб чиқилаётган дорилардан бири — AstraZeneca вакцинаси.
Пандемия бошидан буён Таиландда 336,3 минг киши COVID-19’га чалинган, шуларнинг 2,7 минги вафот этган.
Шунингдек:- Жанубий Корея пойтахти Сеулда энг юқори — тўртинчи даражали коронавирус чекловлари кучга кирди, улар икки ҳафта амал қилади. Бу мамлакатда июнь охиридан буён касалланиш даражасининг ошиши фонида содир бўлди. 9 июль куни бутун пандемия даври учун рекорд кўрсаткич қайд этилди — бир кунда мамлакатда 1316 кишида вирус аниқланди, шуларнинг 503 нафари Сеул аҳолисидир.
- Германиянинг BioNTech биотехнология компанияси юз кун ичида коронавируснинг янги штаммларига қарши вакцина яратиши мумкинлиги ҳақида компания раҳбарлари маълум қилди. Янги вакцина учун компания томонидан аллақачон ишлаб чиқилган дори асос қилиб олиниши мумкин (бу компания Pfizer билан ҳамкорликда вакцина ишлаб чиққан эди). Улар август ойидаёқ дельта штаммига қарши вакцинани клиник синовдан ўтказишни бошламоқчи.
Изоҳ (0)