Кубада 30 йил ичидаги энг йирик намойишлар бўлиб ўтди. Аҳоли коронавирусга қарши вакцина талаб қилди

11 июль куни Кубанинг Гавана ва бошқа шаҳарларида бир неча минглаб аҳоли коммунистик ҳукуматга қарши кенг кўламли норозилик намойишларига чиқди. Бу ҳақда BBC News хабар бермоқда. Ушбу намойишлар қарийб 30 йил ичидаги энг йириги деб баҳоланмоқда.

Акция иштирокчилари эркинлик, демократия ҳамда коронавирус пандемиясига қарши курашиш учун аҳолини вакциналар билан таъминлашни талаб қилди. Намойишчилар «Эркинлик!», «Йўқолсин коммунизм!» ва «Биз қўрқмаймиз!» каби шиорларни баралла айтган.

Гаванага қуролли хавфсизлик кучлари жойлаштирилди, муштлашувлар ва ҳибсга олишлар ҳақида хабарлар келиб тушди.

Гаванадан 30 км жанубда жойлашган Сан-Антпнио-де-лос-Баньосда намойишчилардан бирининг маълум қилишича, одамлар «электр таъминоти ва егуликлар билан боғлиқ вазият»дан норози. «Энергетика билан боғлиқ ҳолат бу ерда қандайдир реакцияни келтириб чиқарган кўринади», — дея эътироф этди Куба президенти Мигель Диас-Канель норозиликни қўзғашда «Куба—Америка мафияси»ни айблар экан.

Шунингдек, Куба раҳбари ҳукумат тарафдорларини кўчаларга чиқиб, провокацияларга қарши туришга чақирди. «Биз Америка империясига сотилган аксилинқилобий ёлланма шахсларнинг ҳеч бирига беқарорликни келтириб чиқаришга йўл қўймаймиз. Бунга инқилобий жавоб бўлади. Мана шунинг учун биз барча коммунистларни бундай провокациялар юз берадиган кўчаларга чиқиб, уларга қатъий қаршилик кўрсатишга чақирамиз», — деди президент давлат телевидениеси эфирида.

Айни пайтда Вашингтон Кубада сўз эркинлигини қўллаб-қувватлаб, тинч намойишчиларга қарши зўравонликни қоралашини билдирди. «АҚШ бутун Кубада сўз ва йиғилиш эркинлигини қўллаб-қувватлайди ҳамда ўз базавий ҳуқуқларини амалга ошираётган тинч намойишчиларга қарши ҳар қандай зўравонлик ёки ҳужумларни қатъиян қоралайди», — деб ёзди АҚШ президентининг миллий хавфсизлик бўйича ёрдамчиси Жейк Салливан ўз Twitter’ида.

Таъкидланишича, кубаликлар сўнгги марта 1994 йилда намойишларга чиққан, ўшанда улар Фидель Кастронинг сиёсатидан норози бўлган эди. Ўшанда намойишлар фақат Гаванада бўлиб ўтган ва тезда бостирилган. Шундан кейин Куба ҳукумати сув чегараларини назорат қилишдан бош тортган, кейинги йилларда юз минглаб кубаликлар қайиқларда мамлакатни тарк этган; уларнинг кўпчилиги АҚШга йўл олган.

Пандемия ва чегараларнинг ёпилиши ортидан Кубада иқтисодий инқироз кучайди. Бундан ташқари, коронавируснинг биринчи ва иккинчи тўлқинлари нисбатан юмшоқ кечган Кубада июль бошидан буён COVID-19’нинг кескин авж олиши кузатилмоқда. 11 июль куни мамлакатда кунлик касалланиш ҳолатлари бўйича рекорд қайд этилди: қарийб 7 минг киши вирусга чалинди.