Туркманистон Ташқи ишлар вазирлиги матбуот хизмати Афғонистон чегарасидаги вазият юзасидан баёнот берди ҳамда Россия оммавий ахборот воситаларини нотўғри ахборот тарқатишда айблади.
ТИВ матбуот хизматининг хабар беришича, сўнгги кунларда бир қатор Россия ОАВлари «туркман-афғон чегарасидаги вазиятга оид текширилмаган ва очиқдан очиқ нохолис хабарларни» тарқатмоқда.
«Хусусан, ‘РБК’ телеканали Афғонистон билан чегарага Туркманистоннинг ҳарбий техникаси ва артиллериясининг жалб қилиниши ҳақида ҳақиқатга тўғри келмайдиган ахборотларни тарқатди, бу эса арзон шов-шув ортидан қувиб, ёлғон маълумот тарқатишдан бошқа нарсани англатмайди», — дейилади хабарда.
Ташқи ишлар вазирлигининг таъкидлашича, икки қўшни давлат ва уларнинг халқлари ўртасидаги биродарлик муносабатлари туфайли туркман-афғон чегараси дўстлик ва ҳамкорлик чегараси ҳисобланади.
Туркманистон Мудофаа вазирлигининг баёнотларига кўра, унинг тасарруфидаги барча ҳарбий қисмлар, уларнинг шахсий таркиби ва ҳарбий техникаси доимий жойлашган жойида турибди ва режалаштирилган дастурга мувофиқ режалаштирилган машғулотларни давом эттирмоқда.
«Азалий яхши қўшничилик анъаналарига мувофиқ, шунингдек, халқаро ҳуқуқнинг бузилмас тамойиллари ва икки томонлама шартномаларда мустаҳкамланган мажбуриятларни қатъиян бажарган ҳолда, Туркманистон қардош Афғонистон билан тинч ва яхши қўшничилик алоқаларини сақлаш ва мустаҳкамлашга интилмоқда», — дейилади Туркманистон Ташқи ишлар вазирлиги хабарида.
«Хроника Туркменистана» газетаси 9 июль куни «Толибон» ҳаракати вакиллари Туркманистон билан чегара ҳудудидаги Афғонистоннинг Тургунди шаҳрини эгаллаб олгани ҳақида хабар берганди.
Шаҳарни эгаллаб олиш вақтида икки томон, яъни Афғонистон ҳукуматига қарашли қўшин ҳамда «Толибон» вакиллари миномёт ва гранатомётлардан фойдаланган. Снарядларнинг парчалари Туркманистон ҳудудига ҳам учиб тушгани айтилмоқда. Туркманистон миллий хавфсизлик вазирлиги вакиллари Тургунди ҳудудини эгаллаган «Толибон» аъзолари билан музокаралар олиб бораётгани хабар қилинган.
Аввалроқ «Толибон» вакилларининг Москвага музокаралар учун боргани ҳақида хабарлар тарқалган. Учрашувда ҳаракат вакиллари Россияга Афғонистон томондан чегарани бузиб, Марказий Осиёдаги бошқа мамлакатлар ҳудудига кирмасликлари ҳақида ваъда берган.
Туркманистон президенти Гурбангули Бердимуҳамедов 1 июль куни Хавфсизлик кенгашининг кенгайтирилган йиғилишини ўтказган, унда Афғонистон билан чегара ҳудудидаги ҳарбий сафарбарлик кучайтирилиши қайд этилган.
Шунингдек, 5 июль куни Тожикистон президенти Эмомали Раҳмон тожик-афғон чегарасини мустаҳкамлаш учун армия резервидаги 20 минг нафар ҳарбий хизматчини сафарбар этган, 8 июлда эса Тожикистон Афғонистон билан чегарага қўшимча қўшинларни юбориши, чегарани янада мустаҳкамлаш учун захирадаги яна 20 минг ҳарбийни сафарбар қилиши ҳақида хабар берилган.
Изоҳ (0)