Токиодаги Синдзюку темир йўл станцияси яқинида юқори технологияли реклама баннери ёрдамида улкан мушукнинг тасвири ҳосил қилинди, деб хабар беради Hi-Tech.Mail.ru.

Рақамли реклама баннери учта қаватдан ортиқ жойни эгаллаган ва 4К сифат ҳамда овозларни тақдим этишга қодир эгилган ёруғлик диодли экрани билан қолганларидан ажралиб туради. Эгилган экран катта чуқурликни, шунингдек, махсус кўзойнакларсиз худди ҳақиқийдек кўриниш олган 3D-эффектлардан баҳраманд бўлишни таъминлайди.

Уч ўлчамли янги технологияни Токио кўчаларига ўрнатиш учун Синдзюку станция яқинида улкан уч ўлчамли мушукнинг қисқа видеоси намойиш этилмоқда.

Мушуксимонлар оиласининг рақамли вакили расмий чиқиши 12 июль кунидан бошланади. Ҳозирча бу фақат тест видео.

Мушук ҳар куни эрталаб соат 07:00 да уйғонади ва тунги 01:00 га қадар ҳаракатда бўлади. Вақти-вақти билан у кун давомида реклама ораларида пайдо бўлиб, пиёдаларга миёвлаб туради.

Аввалроқ Google уч ўлчамли «реал» ҳайвонларнинг рўйхатини яна 50 та жонзот билан бойитгани тўғрисида хабар берилганди.