Россиянинг Illusion стартапи телевизор ёки кинотеатр экранида узатилаётган фильмлардан келиб чиқиб, маълум бир ҳидни таратишга қодир Aroma гаджетини яратди, деб хабар беради «Afisha.uz».

Қурилма портатив колонка шаклида яратилган. Aroma ичида тўртта барабан жойлашган бўлиб, уларнинг ҳар бирида турли ҳидларга эга еттитадан картриж ўрин олган. Телевизорга уланиш Bluetooth орқали амалга оширилади.

«Биз овозли йўлак каби ҳидлар йўлаги технологиясини тақдим этамиз. Ушбу ҳидлар худди овоз каби фильм бўйича таралади. Кўплаб ҳидларни ранглар палитраси каби аралашишини таъминлашни режалаштирганмиз. Юздан ортиқ фильмларнинг саҳналарини таҳлил қилиб чиқиб, кутубхонадан, албатта, ўрин оладиган тоза ҳидларни ажратиб олдик. Масалан, қаҳва ва эндигина пишган пишириқ ифори», — дейди лойиҳа раҳбари Иля Финатов.

Дастлабки фойдаланувчилар фильмларга керакли ҳид йўлагини ўзи мустақил қўшади. Ҳозирда таҳлил қилинган ва маълум бир ифорни тақдим этишга дастурлаштирилган фильмлар махсус мобил дастурга йиғилган. Келажакда ушбу жараённи нейротармоқлар ёрдамида автоматлаштириш режа қилинмоқда.

Illusion Aroma’нинг сотувга чиқиш санаси ва нархи эълон қилинмаган.

Аввалроқ Янги Зеландияда «озишга ёрдам берадиган дунёдаги илк қурилма» яратилгани, Тель-Авивдаги университет тадқиқотчилари эса дунёдаги энг митти электрон қурилмани яратгани тўғрисида хабар берилганди.