Қисқа видеоларни алмашишга мўлжалланган TikTok ижтимоий тармоғи фойдаланувчиларга ишга қабул қилинишда видеорезюмени юклаш имконини берадиган дастурни ишга туширди. Пилот лойиҳа ҳозирча фақат АҚШда ишламоқда, деб хабар беради IXBT.
7–31 июль кунлари «TikTok резюме» дастури доирасида Chipotle Mexican Grill ресторанлар тармоғи, Taget улгуржи савдо тармоғи, WWE Superstar теледастури, Shopify интернет-компанияси, TikTok сервисининг ўзи ва бошқа кўплаб компаниялар бўш иш ўринлари учун видео шаклидаги аризаларни қабул қилади. Бунинг учун #TikTokResumes хештегидан фойдаланиш керак.
TikTok ушбу дастурнинг ишга туширилишини карьера ва ишга боғлиқ ижодий контент сони кўпайгани билан боғламоқда. Таъкидланишича, «TikTok’нинг оддий функцияларидан фойдаланган ҳолда қисқа креатив видеороликларни яратиш истеъдодли номзодлар ва карьера имкониятларни қидиришга кўмаклашади».
Эслатиб ўтамиз, 2 июлдан Ўзбекистон қонунига зид равишда фаолият юритаётган айрим ижтимоий тармоқлардан фойдаланиш мамлакат ҳудудида чекланди, хусусан, улар орасида TikTok ижтимоий тармоғи ҳам бор.
Изоҳ (0)