Толяттида 1993 йилда ишлаб чиқарилган оддий «Волга» автомобили сотувга қўйилди. Ушбу автомобиль ноёб ёки камёб эмас, бундай седанлар катта партияда чиққан ва эркин савдода бўлган. Аммо машина эгаси ўзининг «ГАЗ-31029»ини саккиз миллион рублга баҳолаган — бу пулга энг қиммат Toyota Land Cruiser 300 моделини харид қилиш мумкин, деб хабар беради Motor.
Ушбу автомобилнинг асосий ўзига хослиги — машина эгасининг сўзларига кўра, «Волга» ҳеч қачон рўйхатда турмаган ва умумий фойдаланишдаги йўлларда юрмаган. 28 йиллик «вақт капсуласи»нинг одометрида у ҳозирга қадар 10 километр йўл босиб ўтгани кўрсатилган.
«Волга» модель учун стандарт бўлган кул ранг-кўк рангга бўялган — совет даврида ушбу ранг бу каби автомобилларда экзотик кўк, яшил ёки энг камёб қизилдан кўра кўпроқ учраган. Машина интерьери қора рангда, ўриндиқлар кул ранг мато билан қопланган, қурилмалар панели эса ёғоч билан ажратилган.
Машина эгасининг сўзларига кўра, «Волга»га сотувдан олдин ҳеч қандай ишлов берилмаган, чунки у худди янгидек сақланган. Харидорга «Волга» билан бирга ҳисоб-маълумотнома ва автомобиль 1993 йилда сотиб олингани тўғрисида квитанция қўшиб берилади.
Аввалроқ Германияда совет маршалига тегишли бўлган «Волга» кабриолети сотувга қўйилгани, идеал ҳолатдаги «Волга» янги BMW Х2’дан ҳам қимматроқ нархга сотилаётгани тўғрисида хабар берилганди.
Изоҳ (0)