Дунё ва ўзбек спортига оид 10 июль кунининг муҳим хабарлари дайжести билан танишинг.

Ўзбекистон

Токио—2020 Олимпиадасига йўл оладиган барча ўзбекистонлик спортчилар номи маълум бўлди. Ўзбекистон делегацияси 17 хил спорт тури бўйича умумий 71 та йўлланмага эга чиқди. Лицензия сони бўйича рекорд такрорланган бўлса, спорт турлари бўйича янги рекорд қайд этилди.

Фото: Getty Images

Самвел Бабаян «Навбаҳор» клубида маслаҳатчи мураббий сифатида иш бошлади. 50 ёшли мутахассис 10 июль куни клуб аъзоларига таништирилган.

Жаҳон

11 июль куни тонгдан тунгача спорт оламини улкан тўқнашувлар кутиб турибди.

Фото: «Дарё» / Ҳусан Собитов

Аввалига Копа Америка Кубоги финали доирасида Аргентина — Бразилия учрашуви бўлиб ўтади, мазкур баҳс тугаганидан бироз ўтиб UFC юлдузлари Конор Макгрегор ва Дастин Порье ўртасидаги жанг ўтказилади. Якшанба оқшомида теннис бўйича Уимблдон мусобақаси финалида Новак Жокович ва Маттео Берреттини ўзаро тўқнаш келади. Уик-эндни Италия ва Англия терма жамоалари ўртасида Евро—2020 финали якунлаб беради. Қайд этиш керак, сўнгги икки ўйин Англия пойтахти Лондонда бўлиб ўтади.

Аргентина ва Бразилия Америка Кубоги мусобақасида ўзаро 33 марта тўқнаш келади. Уларнинг 15 тасида Аргентина, 10 тасида Бразилия ғалаба қозонган, 8 ўйин дуранг билан тугаган. КОНМЕБОЛ финал олдидан мусобақанинг энг яхши ўйинчилари номини маълум қилди. Унга кўра, Аргентина терма жамоаси ҳужумчиси Лионель Месси ва Бразилия форварди Неймар мусобақанинг энг яхши ўйинчиси номига лойиқ кўрилган.

Лионель Месси ўз эҳтиросларини ҳар доим ҳам намойиш қилавермайди. Бироқ бир ҳодисадан кейин футбол олами илк бор Мессининг омма олдида йиғлашига гувоҳ бўлади... (Давомини ўқиш)

Фото: Instagram/@azzurri

Евро—2020 чорак финалида оғир жароҳат олиб сафдан чиққан Леонардо Спинаццола Италия терма жамоасини қўллаб-қувватлаш учун финалга ташриф буюрди. Футболчи Бельгияга қарши ўйинда товон пайларини жиддий шикастлаб олганди. Аввалроқ у муваффақиятли операция қилинди. Футболчи 6 ойдан бир йилгача майдонга туша олмайди.

Трансфер янгиликлари

«Барселона» Месси билан янги шартнома имзолаш учун футболчиларини сотишда давом этмоқда. Бу сафар каталонлар ҳимоячи Карлес Аленьяни «Хетафе»га қўйиб юборди. Трансфер келишувига кўра, каталон клуби кейинги трансфердан 50% улушга эга бўлади. Шунингдек, «Барса»да Аленьяни қайта сотиб олиш ва унинг бошқа клубга трансферини тақиқлаш ҳуқуқи бўлади. Футболчи «Хетафе» билан 5 йиллик шартнома имзолаган. Аввалроқ жамоа Хуниор Фирпо, Конрад де ла Фуэнтени сотиб юборган, Францишку Тринкауни ижарага берган ва Матеус Фернандес билан шартномани бекор қилганди.

Mundo Deportivo’нинг хабарига кўра, «Барселона» ҳужумчи Антуан Гризманни «Атлетико» ярим ҳимоячиси Сауль Нигесга алмашмоқчи. Бу орқали каталонлар ярим ҳимоя чизиғини кучайтириш билан бирга, маошлар ведомостини қисқартириш ниятида.

Теннис

Фото: АP

Жокович афсонавий рекорд арафасида. Новак Жокович «Улкан тож» туркумидаги мусобақа финалига 30 марта чиқди. Унинг ҳисобида 19 та «Улкан тож» бор ва Берреттинига қарши баҳсдаги ғалаба орқали Новак 20 та «тож»га эга чиққан тарихдаги илк теннисчи бўлади. Шунингдек, сербиялик ракеткачи кетма-кет учинчи марта Уимблдон ғолиблигини қўлга киритиши мумкин, 2018 ва 2019 йилги мусобақада Жокович чемпион бўлганди. Аввалроқ Новак Ролан Гаррос мусобақасида ҳам ғолиб чиққанди.

Барча мусобақаларнинг онлайн жадваллари, ўйинлар тақвими, тўпурарлар рўйхати энди битта жойда — кўриш.