Dunyo va o‘zbek sportiga oid 10-iyul kunining muhim xabarlari dayjesti bilan tanishing.
O‘zbekiston
Tokio—2020 Olimpiadasiga yo‘l oladigan barcha o‘zbekistonlik sportchilar nomi ma’lum bo‘ldi. O‘zbekiston delegatsiyasi 17 xil sport turi bo‘yicha umumiy 71 ta yo‘llanmaga ega chiqdi. Litsenziya soni bo‘yicha rekord takrorlangan bo‘lsa, sport turlari bo‘yicha yangi rekord qayd etildi.
Samvel Babayan “Navbahor” klubida maslahatchi murabbiy sifatida ish boshladi. 50 yoshli mutaxassis 10-iyul kuni klub a’zolariga tanishtirilgan.
Jahon
11-iyul kuni tongdan tungacha sport olamini ulkan to‘qnashuvlar kutib turibdi.
Avvaliga Kopa Amerika Kubogi finali doirasida Argentina — Braziliya uchrashuvi bo‘lib o‘tadi, mazkur bahs tugaganidan biroz o‘tib UFC yulduzlari Konor Makgregor va Dastin Porye o‘rtasidagi jang o‘tkaziladi. Yakshanba oqshomida tennis bo‘yicha Uimbldon musobaqasi finalida Novak Jokovich va Matteo Berrettini o‘zaro to‘qnash keladi. Uik-endni Italiya va Angliya terma jamoalari o‘rtasida Yevro—2020 finali yakunlab beradi. Qayd etish kerak, so‘nggi ikki o‘yin Angliya poytaxti Londonda bo‘lib o‘tadi.
Argentina va Braziliya Amerika Kubogi musobaqasida o‘zaro 33-marta to‘qnash keladi. Ularning 15 tasida Argentina, 10 tasida Braziliya g‘alaba qozongan, 8 o‘yin durang bilan tugagan. KONMEBOL final oldidan musobaqaning eng yaxshi o‘yinchilari nomini ma’lum qildi. Unga ko‘ra, Argentina terma jamoasi hujumchisi Lionel Messi va Braziliya forvardi Neymar musobaqaning eng yaxshi o‘yinchisi nomiga loyiq ko‘rilgan.
Lionel Messi o‘z ehtiroslarini har doim ham namoyish qilavermaydi. Biroq bir hodisadan keyin futbol olami ilk bor Messining omma oldida yig‘lashiga guvoh bo‘ladi... (Davomini o‘qish)
Yevro—2020 chorak finalida og‘ir jarohat olib safdan chiqqan Leonardo Spinatssola Italiya terma jamoasini qo‘llab-quvvatlash uchun finalga tashrif buyurdi. Futbolchi Belgiyaga qarshi o‘yinda tovon paylarini jiddiy shikastlab olgandi. Avvalroq u muvaffaqiyatli operatsiya qilindi. Futbolchi 6 oydan bir yilgacha maydonga tusha olmaydi.
Transfer yangiliklari
“Barselona” Messi bilan yangi shartnoma imzolash uchun futbolchilarini sotishda davom etmoqda. Bu safar katalonlar himoyachi Karles Alenyani “Xetafe”ga qo‘yib yubordi. Transfer kelishuviga ko‘ra, katalon klubi keyingi transferdan 50% ulushga ega bo‘ladi. Shuningdek, “Barsa”da Alenyani qayta sotib olish va uning boshqa klubga transferini taqiqlash huquqi bo‘ladi. Futbolchi “Xetafe” bilan 5 yillik shartnoma imzolagan. Avvalroq jamoa Xunior Firpo, Konrad de la Fuenteni sotib yuborgan, Fransishku Trinkauni ijaraga bergan va Mateus Fernandes bilan shartnomani bekor qilgandi.
Mundo Deportivo’ning xabariga ko‘ra, “Barselona” hujumchi Antuan Grizmanni “Atletiko” yarim himoyachisi Saul Nigesga almashmoqchi. Bu orqali katalonlar yarim himoya chizig‘ini kuchaytirish bilan birga, maoshlar vedomostini qisqartirish niyatida.
Tennis
Jokovich afsonaviy rekord arafasida. Novak Jokovich “Ulkan toj” turkumidagi musobaqa finaliga 30-marta chiqdi. Uning hisobida 19 ta “Ulkan toj” bor va Berrettiniga qarshi bahsdagi g‘alaba orqali Novak 20 ta “toj”ga ega chiqqan tarixdagi ilk tennischi bo‘ladi. Shuningdek, serbiyalik raketkachi ketma-ket uchinchi marta Uimbldon g‘olibligini qo‘lga kiritishi mumkin, 2018 va 2019-yilgi musobaqada Jokovich chempion bo‘lgandi. Avvalroq Novak Rolan Garros musobaqasida ham g‘olib chiqqandi.
Barcha musobaqalarning onlayn jadvallari, o‘yinlar taqvimi, to‘purarlar ro‘yxati endi bitta joyda — ko‘rish.
Izoh (0)