Эрон пойтахти Теҳроннинг ғарбий қисмида, тахминан миллий боғ ҳудудида кучли портлаш содир бўлди. Бу ҳақда Fars агентлигига таяниб, «Korrespondent.net» хабар берди.
«Портлаш овози Эрон пойтахтининг чекка ҳудудларига ҳам эшитилган», — дейилади хабарда.
Агентлик хабарига кўра, айни пайтда портлаш содир бўлган жойга ўт ўчирувчилар ва маҳаллий полиция вакиллари етиб келган, улар паркда аслида нима бўлганини аниқлашмоқда.
Дастлабки маълумотларга кўра, портлаш натижасида ҳеч ким жабрланмаган. Ҳодиса ҳақидаги расмий маълумотлар ҳали эълон қилинмаган.
7 июлдан 8 июлга ўтар кечаси Дубайдаги Жабал Али портида кучли портлаш содир бўлганди. Амирлик ҳукуматининг маълум қилишича, портга лангар ташлаган кема бортидаги контейнерлардан бирида ёнғин чиққан, бу эса портлашга сабаб бўлган. Таъкидланишича, контейнерда ёнувчи материаллар бўлган.
Июнь охирида Буюк Британия пойтахти Лондон марказида Elephant & Castle темир йўл бекати яқинида ёнғин содир бўлиб, портлаш ҳам юз берганди. Учта тижорат объекти олов остида қолган, шунингдек, олтита поезд вагони ва телефон будкаси ҳам ёнган.
Аввалроқ Туркиядаги машҳур курорт яқинида йирик ўрмон ёнғини содир бўлгани, Москва марказида пиротехника омбори ёниб кетгани ҳақида хабарлар берилган.
Изоҳ (0)