Туркманистон Афғонистон билан чегара ҳудудига ҳарбий техникаларини жойлаштирмоқда

9 июль куни «Толибон» ҳаракати вакиллари Туркманистон билан чегара ҳудудидаги Афғонистоннинг Тургунди шаҳрини эгаллаб олди. Бу ҳақда «Хроника Туркменистана» хабар қилди.

Шаҳарни эгаллаб олиш вақтида икки томон, яъни Афғонистон ҳукуматига қарашли қўшин ҳамда «Толибон» вакиллари миномёт ва гранатомётлардан фойдаланган. Снарядларнинг парчалари Туркманистон ҳудудига ҳам учиб тушгани айтилмоқда.

Хабарларга кўра, Туркманистон миллий хавфсизлик вазирлиги вакиллари Тургунди ҳудудини эгаллаган «Толибон» аъзолари билан музокаралар олиб бормоқда.

Туркманистоннинг Серхетабат шаҳри Афғонистон билан чегарадан 2 километр узоқликда жойлашган ва у ерга Каахк, Тежен ва Тахтабозор ҳарбий бўлинмаларининг таркиби сафарбар қилинган, шунингдек, бронетранспорт ҳамда артиллерия ҳам ташланган.

Ашхободдаги чегара қўшинлари ва Миллий хавфсизлик вазирлиги қўшинлари госпиталида яраланган ҳарбийларни қабул қилиш учун жойлар тайёрлаб қўйилган. Касалхоналарга снарядлар парчаларининг тушиши оқибатида жароҳат олган туркманистонликлар мурожаат қилмаган.

«Туркмен.неwс» нашрининг қайд этишича, туркманистонлик офицерлар, Серхетабатдаги ҳарбийлар ўз оила аъзолари ва фарзандларини вазият тобора кескинлашаётган ҳудуддан узоқда яшайдиган қариндошларининг уйларига кўчириб юборган.

Аввалроқ «Толибон» вакилларининг Москвага музокаралар учун боргани ҳақида хабарлар тарқалган. Учрашувда ҳаракат вакиллари Россияга Афғонистон томондан чегарани бузиб, Марказий Осиёдаги бошқа мамлакатлар ҳудудига кирмасликлари ҳақида ваъда берган.

Туркманистон президенти Гурбангули Бердимуҳамедов 1 июль куни Хавфсизлик кенгашининг кенгайтирилган йиғилишини ўтказган, унда Афғонистон билан чегара ҳудудидаги ҳарбий сафарбарликни кучайтирилиши қайд этилган.

Шунингдек, 5 июль куни Тожикистон президенти Эмомали Раҳмон тожик-афғон чегарасини мустаҳкамлаш учун армия резервидаги 20 минг нафар ҳарбий хизматчини сафарбар этган, 8 июлда эса Тожикистон Афғонистон билан чегарага қўшимча қўшинларни юбориши, чегарани янада мустаҳкамлаш учун захирадаги яна 20 минг ҳарбийни сафарбар қилиши ҳақида хабар берилган.