Dubay portidagi kemalardan birida portlash sodir bo‘ldi

Dubaydagi Jabal Ali portida 7-iyuldan 8-iyulga o‘tar kechasi kuchli portlash yuz berdi. Bu haqda voqea guvohlariga asoslanib, Al Arabia xabar berdi.

Dastlabki ma’lumotlarga ko‘ra, portlash portdagi neft tashuvchi tankerda sodir bo‘lgan.

Keyinchalik amirlik hukumatining ma’lum qilishicha, portga langar tashlagan kema bortidagi konteynerlardan birida yong‘in chiqqan, bu esa portlashga sabab bo‘lgan. Ta’kidlanishicha, konteynerda yonuvchi materiallar bo‘lgan. Amirlik hukumati politsiya ma’lumotiga tayanib, yong‘in 130 ta konteyner sig‘adigan kichik kemada sodir bo‘lganini aytgan.

Hozir voqea joyida fuqaro muhofazasi guruhlari va favqulodda xizmatlar ish olib bormoqda. Hodisa sabablari tekshirilmoqda.

Rasmiylar, shuningdek, yong‘in nazoratga olingani va portlashda hech kim jabrlanmaganini xabar qildi.

Al Arabia nashrining yozishicha, voqea portga jiddiy zarar ko‘rsatmagan.