«Маъмурий ҳуқуқбузарликлар тўғрисидаги ишларни юритишнинг электрон тизимини жорий этиш бўйича қўшимча чора-тадбирлар тўғрисида»ги Ҳукумат қарори қабул қилинди. Бу ҳақда Telegram’даги «Ҳуқуқий ахборот» канали хабар берди.
Маълум қилинишича, қарор билан Маъмурий ҳуқуқбузарлик тўғрисида ягона электрон иш юритув тизими («E-ma‘muriy ish» тизими) орқали маъмурий ҳуқуқбузарликка оид ишларни юритиш тартиби бўйича низом тасдиқланган..
Унга кўра, маъмурий жавобгарликка тортилган шахслар тўғрисидаги маълумотларни ваколатли органлар томонидан текшириш, зарур маълумотларни олиш ҳамда улардан фойдаланиш «E-ma‘muriy ish» тизими орқали амалга оширилади. Ички ишлар вазирлиги «E-ma‘muriy ish» тизимини ташкил этиш, унинг сифатли ва узлуксиз фаолият кўрсатишини таъминлаш бўйича масъул орган этиб белгиланган.
Қарорга мувофиқ, маъмурий ҳуқуқбузарлик содир этган шахсларга ҳамда процесснинг бошқа иштирокчиларига (жабрланувчи, гувоҳ, холислар ва бошқа иштирокчиларга) ишни кўриб чиқиш вақти ва жойи ҳақида электрон хабарнома юбориш механизми ишлаб чиқилади.
2021 йил 1 сентябргача суд қарори билан ёки бошқа сабабларга кўра бекор қилинган маъмурий жарималарни ёки камайтирилган жариманинг фарқи суммасини автоматлаштирилган тарзда фуқароларга қайтариш механизми яратилади.
Низомга кўра, қуйидагилар маъмурий ишларни юритишда ҳисобга олиш электрон ҳужжатлари ҳисобланади:
- маъмурий баённома;
- маъмурий жазо қўллаш тўғрисидаги қарор.
Шунингдек, автомототранспортларни жарима майдончаларига қўйиш ҳамда чиқариш суд ёки ваколатли органларнинг тегишли қарори асосида «E-ma‘muriy ish» тизимидан фойдаланган ҳолда амалга оширилади. Агар маъмурий жазо қўллаш тўғрисидаги қарор чиқарилган кундан бошлаб 3 ой давомида ижро этишга қаратилмаган бўлса, бундай қарор ижро этилмайди.
Маъмурий ишларни юритишда қонунларнинг ижроси устидан прокурор назорати «E-ma‘muriy ish» тизими орқали амалга оширилиши мумкин.
Эслатиб ўтамиз, 2020 йилнинг ноябрь ойида Ўзбекистонда маъмурий ишларни кўриб чиқиш ваколати судлардан профилактика инспекторларига ўтказилиши мумкинлиги айтилганди.
Изоҳ (0)