Наманган вилоятида бугунги кундаги мавжуд эпидемиологик вазиятдан келиб чиққан ҳолда коронавирус инфекциясига чалинган беморларни марказлашган ҳолда даволаш, уларга тезкор ва сифатли тиббий хизмат кўрсатиш мақсадида 2020 йил вилоят марказидаги «Баркамол авлод» спорт мажмуасида ташкил этилган даволаш ва тақсимлаш маркази фаолияти қайта тикланди, деб хабар беради ЎзА.
Ушбу марказда ҳозирги кунда бир вақтнинг ўзида 400 беморни даволашга мўлжалланган койка-ўринлар ташкил этилган. Шунингдек, оғир реанимацион ҳолдаги беморларни даволаш учун ҳам шароитлар яратилган.
Наманган вилояти ҳокими Шавкат Абдураззоқов тегишли мутасаддилар ва сектор раҳбарлари билан мазкур марказга бориб, масъул идоралар вакиллари иштирокида тақсимлаш марказининг узлуксиз ва изчил фаолият юритиши учун ҳозирланган шароитлар, келгусидаги вазифаларни муҳокама қилган.
Биринчи галда, хавфли касалликка йўлиққан беморларга масъул бўлган шифокорлар ва ҳамширалар учун алоҳида шароитлар яратилишига эътибор қаратилиши зарурлиги таъкидланган.
Қайд этилишича, ҳозиргача COVID-19 инфекцияси аниқланган беморлар Наманган шаҳрида жойлашган вилоят юқумли касалликлар шифохонасида даволанаётган эди. Аммо бугунги кунда вилоятда касалликка чалиниш ҳолатлари ортиб бораётгани сабабли марказни қайта очишга тўғри келган. Марказда турли ҳудудлардан келтирилаётган беморларни даволаш учун барча зарур тиббий жиҳозлар мавжуд. Дори воситалари захираси яратилган. Ҳозирда 100 нафарга яқин малакали тиббиёт ходими марказда фаолият олиб бормоқда.
Аввалроқ Тошкент шаҳрида ДХХ тасарруфидаги «Ёшлик» спорт мажмуасида, ИИВ тасарруфидаги «Универсал» спорт мажмуасида 700 койка-ўринга мўлжалланган ковид-марказ, «Ўзэкспомарказ»да 750 ўринли коронавирусга чалинган беморларни даволашга ихтисослашган марказ қайтадан ташкил этилгани тўғрисида хабар берилганди.
Шунингдек, Самарқандда ҳам 1000 ўринли саралаш ва тақсимлаш маркази ўз фаолиятини қайта бошлади.
Эслатиб ўтамиз, 2020 йил ноябрь ойининг охирларида Атлас ва «Ёшлик» коронавирусга ихтисослашган марказлари, 2020 йил 9 декабрь куни эса «Ўзэкспомарказ»даги ковид-марказ ёпилганди. Ўшанда касаллик динамикаси ошганда ёпилган объектлар тезкор равишда қайта очилиши маълум қилинганди.
Изоҳ (0)