8 июль куни соат 10:27 да Жиззах вилояти Бахмал тумани Новқа қишлоғи бўйлаб ҳаракатланиб келаётган юк машинасига ортилган прессланган сомонлар ёниб кетди. Бу ҳақда вилоят Фавқулодда вазиятлар бошқармаси ахборот хизматига таяниб, ЎзА хабар берди.
Маълум қилинишича, Бахмал туман Узунбулоқ қишлоқ фуқаролар йиғинида яшовчи Д.Асиловга тегишли «ЗИЛ-130» русумли юк машинасига белгиланган баландликка риоя қилинмаган ҳолда прессланган сомон босилган. Оқибатда юк машинасидаги сомон Новқа қишлоғидаги йўл устидан ўтган электр ток симларига тегиб, ёнғин келиб чиққан.
Ёнғин натижасида автотранспорт воситаси ҳамда унга юкланган 250 дона прессланган сомон ёниб кетган. Хабарда ёнғин туфайли ҳалок бўлганлар, жабрланганлар ҳақида маълумот берилмаган.
Ҳодиса жойига 2 та ўт ўчириш бригадаси 8 июль куни соат 10:39 да етиб борган ва ёнғин 10:41 да ўраб олиниб, соат 10:55 да батамом ўчирилган.
Ёнғин оқибатида келтирилган зарар миқдори ва сабаблари фавқулодда вазиятлар мутахассислари томонидан ўрганилмоқда.
Аввалроқ Қамчиқ довонида пахта ортилган юк машинаси ёниб кетгани, Чотқол қўриқхонасидаги қарийб 1 гектар ер майдонида аномал иссиқ туфайли ёнғин чиққани тўғрисида хабар берилганди.
Изоҳ (0)