O‘zbekistonda elektr, issiqlik energiyasi, gaz, suvdan foydalanish qoidalarini buzish bilan bog‘liq ma’muriy huquqbuzarliklar to‘g‘risidagi ishlarni ko‘rib chiqish va jazo qo‘llash vakolati profilaktika inspektorlariga berilmaydigan bo‘ldi. Bu haqda Oliy Majlis Qonunchilik palatasi xabar berdi.

Foto: “Daryo”

Bunday o‘zgarish “Mamuriy javobgarlik to‘g‘risida”gi kodeksga o‘zgartirish va qo‘shimchalar kiritish bo‘yicha qonun loyihasida ko‘zda tutilgandi. Quyi palataning 7-aprel kuni bo‘lib o‘tgan majlisida ushbu loyiha qizg‘in muhokamalarga sabab bo‘lib, birinchi o‘qishda konseptual jihatdan qabul qilingan edi. Amalda bu turdagi qoidabuzarliklar bilan MIB organlari shug‘ullanib kelgan.

19-aprel kuni Oliy Majlis Qonunchilik palatasining navbatdagi majlisi bo‘lib o‘tdi. Unda “O‘zbekiston Respublikasining ayrim qonun hujjatlariga o‘zgartish va qo‘shimchalar kiritish to‘g‘risida”gi qonun loyihasi deputatlar tomonidan ikkinchi o‘qishda ko‘rib chiqilgan.

Muhokamalarda deputatlar ichki ishlar organlari tayanch punktlarining profilaktika (katta) inspektorlariga qo‘shimcha tariqasida berilayotgan vazifalar qator muammolarni keltirib chiqarishini ta’kidlagan. Xalq vakillarining fikricha, bu ularda asosiy ishidan tashqari ish ko‘lami ortishiga, manfaatlar to‘qnashuvi, korrupsion holatlar ko‘payishiga sabab bo‘lishi mumkin.

Munozaralarda ishtirok etgan IIV mas’ullari ham belgilanayotgan normalarga qo‘shilmasliklarini bildirib, bugungi kunda profilaktika inspektorlari zimmasiga ko‘plab vazifalar yuklatilayotgani, har qaysi jihatdan yondashilgan taqdirda ham qo‘yilgan vazifani bajarishga amaliy vaqt yetmasligini, qolaversa, profilaktika inspektorlari bu sohada alohida mutaxassis emasliklarini qayd etgan.

Qonun loyihasi ovozga qo‘yilgach, deputatlarning ko‘pchiligi unga qarshi ovoz bergan va u mas’ul qo‘mitaga qaytarilgan.

Eslatib o‘tamiz, 2020-yilning noyabr oyida O‘zbekistonda ma’muriy ishlarni ko‘rib chiqish vakolati sudlardan profilaktika inspektorlariga o‘tkazilishi mumkinligi aytilgandi.