Ўзбекистонга Испаниядан янги битта «Афросиёб» тезюрар электр поезди олиб келинмоқда. Бу ҳақда «Ўзтемир йўлйўловчи» АЖ матбуот хизмати хабар берди.
Маълум қилинишича, 2021 йил 30 июнь куни ушбу «Афросиёб» поезди Испаниянинг Бильбао портидан Россиянинг Санкт-Петербург портига етиб келган. Бунда, 2 та локомотив ва 11 та вагон, шунингдек, алоҳида яна 4 та вагон мавжуд.
Айни кунда «Ўзбекистон темир йўллари» АЖ мутахассислари россиялик ҳамкасблари билан ҳамкорликда мазкур замонавий поездни рельсга қўйиб, Ўзбекистонга олиб келишни йўлга қўймоқда.
Эслатиб ўтамиз, Ўзбекистон ҳукумати 2019 йилнинг майида «Ўзбекистонда, темир йўлларда йўловчи ташишни ривожлантиришни қўллаб-қувватлаш доирасида битта Талго – 250 тезюрар поезди ва яна қўшимча тўртта вагон сотиб олиш ҳақидаги қарор»ни қабул қилганди. Унга кўра, 2021 йил охирига қадар 57,5 миллион евро эвазига битта Талго – 250 тезюрар поезди ва қўшимча тўртта вагон етказиб берилиши керак эди.
Маълумот учун, янги «Афросиёб»ларнинг дастлабкиси 2017 йилнинг март ойида Ўзбекистонга етиб келган эди. Бунгача 2011 йили дастлабки битта Талго поездлари Ўзбекистонга олиб келинганди. Шу йилнинг ўзида Шавкат Мирзиёев Бухорода янги «Афросиёб» поезди имкониятлари билан танишган.
Изоҳ (0)