Namangan viloyatida bugungi kundagi mavjud epidemiologik vaziyatdan kelib chiqqan holda koronavirus infeksiyasiga chalingan bemorlarni markazlashgan holda davolash, ularga tezkor va sifatli tibbiy xizmat ko‘rsatish maqsadida 2020-yil viloyat markazidagi “Barkamol avlod” sport majmuasida tashkil etilgan davolash va taqsimlash markazi faoliyati qayta tiklandi, deb xabar beradi O‘zA.
Ushbu markazda hozirgi kunda bir vaqtning o‘zida 400 bemorni davolashga mo‘ljallangan koyka-o‘rinlar tashkil etilgan. Shuningdek, og‘ir reanimatsion holdagi bemorlarni davolash uchun ham sharoitlar yaratilgan.
Namangan viloyati hokimi Shavkat Abdurazzoqov tegishli mutasaddilar va sektor rahbarlari bilan mazkur markazga borib, mas’ul idoralar vakillari ishtirokida taqsimlash markazining uzluksiz va izchil faoliyat yuritishi uchun hozirlangan sharoitlar, kelgusidagi vazifalarni muhokama qilgan.
Birinchi galda, xavfli kasallikka yo‘liqqan bemorlarga mas’ul bo‘lgan shifokorlar va hamshiralar uchun alohida sharoitlar yaratilishiga e’tibor qaratilishi zarurligi ta’kidlangan.
Qayd etilishicha, hozirgacha COVID-19 infeksiyasi aniqlangan bemorlar Namangan shahrida joylashgan viloyat yuqumli kasalliklar shifoxonasida davolanayotgan edi. Ammo bugungi kunda viloyatda kasallikka chalinish holatlari ortib borayotgani sababli markazni qayta ochishga to‘g‘ri kelgan. Markazda turli hududlardan keltirilayotgan bemorlarni davolash uchun barcha zarur tibbiy jihozlar mavjud. Dori vositalari zaxirasi yaratilgan. Hozirda 100 nafarga yaqin malakali tibbiyot xodimi markazda faoliyat olib bormoqda.
Avvalroq Toshkent shahrida DXX tasarrufidagi “Yoshlik” sport majmuasida, IIV tasarrufidagi “Universal” sport majmuasida 700 koyka-o‘ringa mo‘ljallangan kovid-markaz, “O‘zekspomarkaz”da 750 o‘rinli koronavirusga chalingan bemorlarni davolashga ixtisoslashgan markaz qaytadan tashkil etilgani to‘g‘risida xabar berilgandi.
Shuningdek, Samarqandda ham 1000 o‘rinli saralash va taqsimlash markazi o‘z faoliyatini qayta boshladi.
Eslatib o‘tamiz, 2020-yil noyabr oyining oxirlarida Atlas va “Yoshlik” koronavirusga ixtisoslashgan markazlari, 2020-yil 9-dekabr kuni esa “O‘zekspomarkaz”dagi kovid-markaz yopilgandi. O‘shanda kasallik dinamikasi oshganda yopilgan obyektlar tezkor ravishda qayta ochilishi ma’lum qilingandi.
Izoh (0)